Thurmur ka rukom ai Examination Centre ïa ki samla pule ba thoh CUET

Shillong, Nailar, 31: Ka Education Cell jong Khasi Student’s Union (KSU) Central Executive Council ha ka sngi Balang ka la ujor sha ka tnat Pule Puthi jong ka Sorkar Jylla ban pynsngew halor ka jingleh thurmur ïa ka rukom ai Examination Centre sha ki samla pule kiba hap ban ïakhun ïa ka eksamin Central University Entrace Test (CEUT).
Ka Seng hapoh ka jingïalam jong u Education Secretary u Samla Raymond Kharjana bad u Asst. Education Secretary u Samla Rueben A Najiar ki la ïakynduh kyrpang ïa u Secretary jong ka tnat Pule Puthi ka Sorkar Jyla u Ambrose CH Marak ban pynsngew halor kane ka jingïakynduh jingeh jong ki samla pule.
Kane ka jingïakynduh jong ka Seng ïa u Secretary ka tnat Pule Puthi ka long hadien ka jingud jingnam jong kiba bun ki samla pule ha kaba ïadei bad ka jingbuh ne ai kulmar ïa ki Examination Centre lane ki Test Centre ban thoh ïa ka Examination CUET.
“Kane ka la jia hadien ba ka don ka jingai Test Centre sha Guwahati haba ki samla pule ha ka por ba ki aplai ïa ka CUET ki jied ïa ka Examination City hapoh ka Jylla lajong,” ong ka Seng.
Shuh shuh kaba pynklumar ïa ki samla pule ka dei namarba ha ka Advance Examination City Intimation ka paw hapoh nongbah Shillong katba ha ka Admit Card pat ka Test Centre ka dei sha nongbah Guwahati.
Na ka liang jong u Secretary ka tnat Pule Puthi u la la ai ka jingkular sha ka seng ba ma u lem bad u Chief Secretary ka Sorkar Jylla u Bah Donald P. Wahlang, kin tuklar mardor ïa kane ka bynta.
Ka Seng ka lah banjur ruh ba ka tnat Pule Puthi jong ka Sorkar Jylla ba ka dei ban wanrah kloi noh ïa ka jingpynbeit ïa kine ki kynrum kynram ha shuwa ban sdang ka eksamin CUET Phase 1 ka ban long ha ka 1 tarik, 2 tarik bad 3 tarik, Nailur.
Na ka liang u Myntri ka tnad pule puthi u ma Lahkmen Rymbui u la ïathuh wat la ka eksamin CUET kan sdang naduh lashai ka sngi hynrei na ka liang ka tnad ka la ïakren bad ki bor pynïaid ka National Testing Agency (NTA) halor kine ki 10 ngut ki samla pule kiba ïa kynduh ïa kane ka jingeh.
“ Nga la bthah ïa u Commissioner bad Secretary ka tnad pule puthi ban ïakren bad ka NTA bad ka jingïakren ka dang ïaid tangba ngim pat ïoh kano kano ka jubab na ka NTA, hynrei nga kyrmen skhem ba ka NTA kan leh ïa kaba donkam halor kine ki 10 ngut ki samla pule bad kan ai ruh ïa ka bhah pule jongki ha kane ka jylla lada don ki jaka ba lait.
U la ïathuh ba hangne ha Meghalaya ka eksamin CUET kan long ha Shillong, Ri Bhoi bad Tura.
Haba kylli katno ngut ki samla kiba hap ban ïaleh ïakane ka eksamin, u ma Lahkmen ula ïathuh ba um don jingtip namar ki samla ki thep beit ïa ki form sha ka NTA bad kane pat kam pat ai jingtip sha ka sorkar jylla kat haduh mynta ka sngi.