Jowai, Naitung 08: Wat la ïa ka World Environment Day la dep ban rakhe naduh ka 5.06.2024 hynrei ka ‘Sarot I Man’ kawei na ki kynhun shi paralok naka shnong Panaliar, Jowai ka dang bteng ïa ka jingthung dieng ka jong ka haduh mynta.
Kane ka kynhun ka lah dep ong ba, ym myntoi ban shu thung ia ki dieng, lada khlem da sumar ïa ki. Kumta ha ka 07.07.2024 ka Sarot I man ka la leit pynkhuid ïa ki tynrai dieng, kiba ka lah dep thung na ki snem ba myn shuwa.
Ha ka jingleit pynkhuid, kala lap ba ki tynrai dieng ki lah heh la san da ka jingsumar ki dkhot, kiba la leit pynkhuid arsien ha ka shisnem. Ha kane ka juh ka step, lathung biang ïa ki 20 tynrai ki dieng ha ka Kiang Nangbah Memorial Park, Treriat ka Kiang, Pynthorwah Panaliar, Jowai.
Related Posts
Ha shuwa ban thung ïa ki dieng, ladon ka jingïalang ba lyngkot kaba la pynïaid da u Ram Sumer, dkhot ka group bad la ai jingkren lyngkot da u Jait dao Sumer, dkhot ka group. Kum ka dak ban pan ïa ka jingkyrkhu na ka Mei Ramew ba kan ïada ïa ka pyrthei ka mariang, la ai ïa ka nguh ka dem da u Shape Paswet, dkhot ka group.
Ha ka jingkren jong u ma Jait dao Sumer, ula ïathuh ba kane ka dei ka sien balai ba ka Sarot I Man ka pynlong ïa ka jingthung dieng, da kaba ong ba la pynlong ïa ka World Environment Day naduh u snem 1973, da ka jingïohi jngai ki riew shemphang ban ïada ïa ka mei mariang. Ula ai nuksa ha ka shnong lajong, ha Jowai, shibun kiba la ktah ïa ka jingpynjot ïa ka mei mariang, khamtam ba mynta ladon jingthmu ruh wat ban pynduh ïa u Lum Mooliksoo, u ba dei uwei na ki source ka lyer bad ka um, na ka bynta ki nongshong shnong.
Ka Sarot I Man ka ai khublei kyrpang ïa u Eddy Murphy H. Passah uba la ai sngewbha ïa ki tynrai dieng sha ka group khlem da shim kano kano ka jingsiew dor, la ai khublei ruh ïa ka Jaiñtia Iasiat Khnam Memorial Society kaba lashah ïa ka Group ban thung ïa ki tynrai dieng ha ka jaka jong ka bad ha kajuh ka por ia ka shnong Panaliar kaba dei ka nongpeit nongsumar ïa ki jaka badei hapoh u pud u sam jong ka.