Shillong, Nailur 23: Ka Khasi Students’ Union lyngba ka Employment Monitoring Cell ka la phah dorkhas sha u Sampath Kumar, IAS, u ba bat kum u Development Commissioner jong ka tnat Planning, Investment, Promotion & Sustainable Development Department (PIPSDD).
Kane ka tnat ka la aiti sha ka agency Bharti Institute of Public Policy (ISB) ban thung ïa 28 tylli ki post hapoh ka jylla ki ban long kum ki consultant ban ïarap ïa ki District Magistrate bad ki Deputy Commissioner.
Ka Seng ka lap ba la advertise ïa kine ki post tang ha LinkedIn kaba long tang kum kawei ka social media app hynrei ym shym lah pynlait paidbah lyngba ki website jong ki tnat sorkar ne ha ki kot khubor. Kane ka jingleh ka wanrah ba kan don ka jingthung kam kaba sop sop khlem da pyntip ïa ki samla wad kam jong ka jylla.
Na ka liang ka seng ka la ong ruh ba ym shym la pyntip bniah halor ka rukom ban shah jied ne mano ban lah ban aplai ïa kine ki kam ba lah buh.
La lap ruh ba kane ka agency ka buh kyndon ba 50% na kine ki post yn leit sha ki briew nabar jylla, ïa kane hi na ka liang ka Seng kan nym lah ban pdiang bad marsien ujor lah weng noh ïa kane.
Shuh shuh na ka liang ka seng kam lah ban sngewthuh ba balei ba hap thung ïa kine ki agency ban ïarap ïa ki Districts Magistrate bad ki Deputy Commissioners kiba la pass ïa ki MCS/IAS bad kiwei kiwei ki eksamin. Hato kine DM bad DC kim dei ki briew kiba lah tbit lypa ban pynïaid ïa kino kino ki schemes ne peit ïa kino kino ki ishu ba ki shah thung ha kine ki post.
Ka Seng ka lap ba lah jyllei kine ki consultancy agencies ha ka Secretariat bad man la ki tnad jong ka ophis sorkar. “Kaei ka jingmyntoi ba ngi ki paidbah ki ïoh na kum kine ki agency, ka kam aïu ba ki trei ba ki nongtrei sorkar kim lah bad ka policy aïu ki la lah ban shna na bynta ka jingbha jong ka imlang sahlang. Kine ki agency ki shu pynsyrwa ïa ka pisa u paidbah bad la thaw khnang ïa kine ki agency tang ban pynrung kam rung jam ïa ki khun ki heh ki haiñ. Tang katto katne ngut hi kiba ïoh da ka hok bad jingnang jingstad la jong,” ong ka KSU.
Ka Seng ka ai jingmut ba da donkam kino kino ki research ne project ne data collection, ka Sorkar ka dei ban ai sha NEHU ne kiwei ki university jong ka Jylla khnang ba ki samla jong ka jylla hi kin ïoh kam bad kan plie lad ïa kiwei ki bynta jong ka pule puthi bad ki trai jylla hi kin sngewthuh kham bha ïa ka jylla la jong ban ïa ki agency ba na shabar.
Ka Seng ka dawa ba lada ka Sorkar ka ïaid shakhmat ïa kane ka kam lyngba kane ka agency, ka dei ban thep beit thik tang ïa ki trai muluk trai jylla ha baroh kine ki 28 tylli ki posts bad lada long da kumwei ka Seng ka nym ailad. Ka Seng ka la ban ruh ba dei ban thung kam lyngba ki eksamin hynrei ym ban shu thung khlem don kino kino ki kyndon ba biang.
Na ka liang Sampath Kumar, u la kular ban shim khia halor ki ki mat bad jingmut ba la ai da ka Seng.
