Thung ka Sorkar da ki tynrai dieng Cherry Blossom, Jacaranda bad Gul Mohor ha Ummir

Shillong, Jylliew, 05: Ka Sorkar Jylla kaba la rakhe ïa ka World Environment Day ha ka sngi Palei ka la thung palat shi hajar tylli ki tynrai dieng ha ka shnong Ummir, New Shillong ba kynthup ïa ki tynrai dieng Cherry Blossom, Jacaranda bad Gul Mohor.
Ïa kane ka jingrakhe ba la pynbeit da ka tnat Pynroi Sor bad ka tnat Soil & Water Conservation la sakhi da u Myntri Rangbah ka Jylla u Conrad K. Sangma bad u Symbud Myntri Rangbah u Bah Sniawbhalang Dhar, ki heh ophisar ka sorkar jylla, ki khynnah skul, ki dkhot jong ki Self-Help Group, ki nongïalam shnong bad kiwei kiwei.
U Myntri Rangbah haba kren ha kane ka sngi u la kyntu ruh ïa ki paidbah ba kin pyndonkam ïa ki pla khnang ban pynduna ïa ka jingpyndonkam ïa ki plastik bad ruh ban ïada ïa ka khyndew.
U la pyntip ruh ïa ka jingthmu ban pynitynnat ïa ka mariang bad ïa ka jylla Meghalaya da kaba thung ïa ki syntiew Cherry ha kylleng ka jylla.
Haba ïasam jingtip shaphang ka jingpyntreikam kaba jop ïa ka skhim Payment for Ecosystem Services (PES), kaba ai jingkyrshan pisa ïa ki nongshong shnong kiba trei ha kaba pynneh pynsah bad pynjyrngam ïa ki khlaw ki btap, u Sangma u la ïathuh ba ka jingthmu jogn ka Green Meghalaya kaba kham heh, palat 50,000 hectare ka khlaw ladep ban thung ïa ki tynrai dieng.
“Ka Sorkar mynta ka thmu ban kyntiew ar shah ïa kane ka jingpynmih sha ka 1 lak hectare hapoh ka prokram GREEN Plus ka ban sa wan. Ïa kine ki jingthmu la pyntyllun khnang ban pynïasoh beit ïa ki paidbah ha kaba ïada ïa ki khlaw bad ki marpoh khyndew,” u la ong.
Ha kane ka sngi la pynbna ruh ïa ka “Mission Clean Shillong 2027,” ban pynkylla dur ïa ka sor Shillong kaba lait na ka jingjaboh khnang ba ki wah bad ka lyer kin long kiba khuid kum ka jingpynkhreh ïa ka National Games ka ban sa long ha u snem 2027.
Nalor kata, la pynbna ruh ïa ka “Building a Climate Resilient Green Economy,” kaba long ka thong ban pynneh pynsah bad ban pynjyrngam ïa ka mei mariang.
Shuh shuh ka Sorkar Jylla ka la ai sngewbha da ka song pisa kaba mar T. 25 hajar sha ki 10 tylli ki shnong kiba don ha jylli ka sor Shillong kiba kynthup ïa ka shnong Mission Compound, Jaïaw Shyiap bad Lum Pyllon, Cleve Colony, Jaïaw Lan Sona Lane, Jaïaw Pdeng, Riatsamthiah, Lumïablot, Wahingdo, Nongrim Hills bad Rynjah halor ka jinglah jong ki Dorbar Shnong bad ki nongshong shnong ban sumar khuid ïa ka shnong ka thaw baroh kawei.
Nalor kine, ka sorkar ka la ai khusnam ruh ïa ki 14 tylli ki skul kiba leh khuid leh suba ïa ki sawdong sawkun jong ka skul.