Thung ka sorkar da ka Judicial Inquiry Commission ban tohkti bniah halor jingbthei ha krem dewïong
Kiew sha ka 28 ngut kiba ïap, 8 ngut kiba mynsaw
Shillong, Rymphang 09 : Ka sorkar jylla ka la thung da ka Judicial Inquiry Commission ban tohkit bniah halor ka jingbthei ha krem dewïong dang shen ha Thangsko, East Jaintia Hills kaba la shim da ki phew tylli ki mynsiem briew bad wanrah ruh ïa ka jingmynsaw jur ai kiba bun kiwei pat.
Katkum ka kyrwoh na u Executive Director ka State Disaster Management Authority ha kane ka sngi Nyngkong, la pyntip ba ka jingdon kiba khlad na ka jingbthei ha krem dewiong ha Thangsko ka la poi 28 ngut bad kiba mynsaw pat ki long 8 ngut. Ka kyrwoh ka pyntip ruh ba ka jingwad la pynsangeh (called off) ha ka por 5:00 baje janmiet jong ka 09tarik, Rymphang 2026.
Halor kane haba kren bad ki lad pathai khubor, u Symbud Myntri Rangbah ka Jylla, Bah Prestone Tynsong u la ong, “Ngin sa thaw da ka Judicial Inquiry Commission haba ïadei bad kane ka jingjia bad ngin aiti ïa kane ka kam ha ki. Tang shu dep thung ïa u Chairman shen kin sa sdang noh ïa ka jingtohkit.”
U Symbud Myntri Rangbah u la pyntip ruh ba ki kynhun ai jingïarap ki dang bteng ban don ha katei ka jaka ban wad ïoh dang don ki briew kiba la ïap ne ba mynsaw kiba dang sahkut shapoh.
Shwa kane, u Myntri Rangbah ka Jylla Conrad K Sangma ha ka kyrwoh u la pyntip ba ka sorkar ka la rai ban thaw ïa ka Judicial Inquiry Commission hapoh ka Commission of Inquiry Act ban tohkit halor ka jingbthei ha ka krem dewïong beain ha Mynsngat – Thangsko.
Ha kajuh ka por la pynbna ruh ba ka sorkar Meghalaya ka dang bteng ban wad ïoh ki dang don ki briew kiba dang sahkut.
“Baroh ki lad ai jingïarap kynthup naduh ki kynhun ai jingïarap ba kyrkieh, ki bor distrik, ki bor pulit, na ka State Disaster Response Force, bad National Disaster Response Force, ki la poi mardor ha katei ka jaka ban trei ïa ka kam hapdeng ki jingeh kiba bun na ka jinglong ka jaka ban pyntikna ban ïoh ai ka jingïarap kaba mardor bad kaba kyrkieh,” ong ka kyrwoh.
Shuh shuh la pyntip ba ïa ka bai luksan la dep ban pynbna sha ki bahaiing ha sem jong kiba khlad ha kane ka jingjia nalor ka jingbteng ban ai ka jingkyrshan ïa kito kiba mynsaw.