Shillong, Naitung, 10: Ka Executive Committee jong ka Khasi Hills Autonomous District Council (KHADC) mynta ka kynti ka la shim ïa ka rai ban pynbeit pynryntih ïa ka rukom thep bad sei pisa jong ka Council hadien ba la lap dang shen ba ka don ka jingpyndonkam bakla ïa ka pisa da u Plantation Chowkidar hapoh ka tnat Forest kaba la kot haduh 38.30 lak.
Dang shen ka EC jong ka KHADC ka la shim rai ban pynshitom ïa u Plantation Chowkidar u Bah Franklin Khymdeit da kaba shu phah siew dep ïa ka pisa katkum ka jingai jingmut jong ka Enquiry Committee hadien ba la lap ba u la pyndonkam bakla haduh T.38.30 lak ka pisa jong ka Council.
Ha ka jingïakren bad ki lad pathai khubor u Chief Executive Member (CEM) jong ka Khasi Hills Autonomous District Council u Bah Titostarwell Chyne u la ong ba ka Council ka don ïa ka Financial Rules hynrei ym pat shym la pyntreikam haduh mynta.
“Phi la ïohi wat ha ka kaiphod jong u Comptroller Auditor General (CAG) ba wat ïa ka Cash Book ruh ym shym la buh,” u la ong.
“Ngi la shim mynta ïa rai ba ka Executive Committee kan thung da u Chartered Accountant bad ka kynhun jong u na ka bynta ban tohkit lut ïa baroh ki Accounts bad ban pynbeit ryntih ïa ka rukom thep bad sei pisa bad manla ka lai bnai kan don ka jingshim jingkheiñ,” u la ong.
Haba kylli, u CEM u la ong, “ka jingshim rai jong ka EC ban pynshitom ïa u (Plantation Chowkidar) ka dei hi katkum ka jingai jingmut jong ka Enquiry Committee. Ngi la rah hapoh ka Executive Committee bad ka EC ka la sngew ïahap ïa ka jingai jingmut jong ka Enquiry Committee bad dei na kata ka daw ba ngi la pyntreikam ïa ka jingai jingmut.”
U la ïathuh ba ha kane ka jingpyndonkam bakla ïa ka pisa dei tang u Chowkidar uba donkti bad uba la phla ruh hakhmat ka Enquiry Committee ba u la pyndonkam bakla ïa ka pisa. “Da lade hi u la kyrpad hakhmat ka Enquiry Committee ban pynshitom ïa u da kaba shu siew dep ïa ka pisa,”u la bynrap.
Ka EC ka la rai ban shu khate T.10 hajar manla u bnai na ka tulop jong u khnang ïoh biang ïa ka pisa kaba u la pyndonkam bakla.
“Ïa u Chief Forest Officer (CFO) u Bah T. Saibon ngi shu phah siew tang shi sien siew namarba ha ka jingtohkit la lap ba um donkti eiei ruh em namarba u dei u Khlieh jong ka tnat Forest,” u la ong.
Shuh shuh u CEM u la ong ba ka jingshim rai ban shu phah siew dep ïa ka pisa kaba u Chowkidar u la pyndonkam bakla ka dei katkum ka jingsngew briew nalor ba u dei u briew uba la don la ka jong ka ing ka sem bad lada set along mano ban bsa pat ïa ki khun ki kti jong u.
Katkum ka jingong jong u CEM, u Bah Khymdeit un ym ïoh shuh wat ïa ka pisa kaba u la pynlang, nalor ka GPF bad kiwei kiwei de ki jingmyntoi kiba ka Council ka ai sha ki nongtrei.
U la ong ruh ba ka jingbym pynshitom katkum ki kyndon jong ka Service Rules jong ka Council ka dei namarba ka Enquiry Committee ka la kdew ba ka don ka lynti ban shu phah siew ïa ka pisa ba la pyndonkam bakla bad ym dei ba la shu rai khlem ka nongrim.
