Shillong, Naitung 24: Ka Khasi Hills Autonomous District Council (KHADC) ka la shim ka sienjam kaba donkam ban pynthikna ba kan don ka jingtreikam kaba khuid ba suba haba ïadei bad ka jingthungkam hapoh ka Council ha kaba ka la thung da ka recruiting Committee ba 3 ngut ki dkhot halor kane ka kam.
Ïa kane ka rai la shim da ka executive committee ha ka jingïalang kaba la long ha ka sngi Palei.
Haba kren sha ki lad pathai khubor u executive member u Bah Powell Sohkhlet u la ïathuh ba ïa kane ka committee yn pynïaid da u retired IAS officer Bah W Khyllep bad kan kynthup ïa Prof LS Gassah na NEHU, ba dei riewshemphang halor ka Sixth Schedule, bad Dr PS Nianglang, ophisar ba rim uba la tip bha shaphang ki service rules. Katba Joint Secretary ka KHADC yn donlang kum member secretary.
U Bah Sohkhlet u la pynpaw ruh ba ka jingthmu ba nyngkong jong kane ka committee ka long ban pynthikna ba ka thungkam thungjam kan long haba shit bashai da kaba buh ïa ki jingmynjur ban pynlong ïa ki eksam bad ki interview.
“Kane ka committee kan bishar kam ruh halor ki service rules kiba don mynta, kiba la don mynta lah bun bun snem, bad kin sa shim ki jingmynjur ba donkam bad ban phah sha ka council,” ong u Bah Sohkhlet.
Shuh shuh u EM u la ong ba kane ka recruitment committee kan treikam kum ka met kaba laitluid, kaba lait na kino kino ki jingshah tuklar, khnang ban pynthikna ba ka kam kan long kaba khuid kaba shit ba shai haba ïadei bad ki rukom thungkam thungjam.
Haba kylli, u Bah Sohkhlet u la ong ba ka recruitment committee kan sa peit bniah ïa baroh ki jingthungkam hapoh ka council bad kan long ruh ka permanent body. Ïa kane ka committee shen yn sa pynmih ka jingpynbna ha ryngkat bad ki samoi treikam bad la khmih lynti ba kan wanrah ïa ka khuid ka suba bad ka jingkheiñ kaba shai halor ki rukom thungkam thungjam ha KHADC, u la ong.
