Shillong, Lber 27: Ka Kynhun kiengatiar Hynñiewtrep National Liberation Council (HNLC) kala thung ïa u President ka seng Hynñiewtrep National Youth Front (HNYF) Bah Sadon K Blah ba un mihkhmat bad ban ïakren bad ki ksiang ka sorkar, ban buddien ïaka lynti sha ka jingïakren iasuk.
“Ngi (HNLC) la thung ïa u Bah Sadon K Blah, President HNYF kum u Nongmihkhmat jong ngi, u ban ïakren bad ki ksiang bala thung da ka Sorkar Bah Peter S Dkhar (Retd IAS) bad u A.K Mishra, Advisor MHA Northeast (Retd IPS), ban buddien ïa ka lynti sha ka jingïakren iasuk” ong u Bah Saiñkupar Nongtraw, General Secretary cum Publicity Secretary ka HNLC.
Ha ka kyrwoh bala phah sha ki lad pathai khubor, une u Nongïalam ka HNLC ula ong “Kane ruh ka dei ka sien jam kaba biang eh ha kaban ïoh ïa ka jingsuk”.
“Ngi da kyrmen ba u Nongmihkhmat jong ngi bad ki ksiang kin iatrei ryngkat ryngkat ha kaban wanrah ïa ka jing suk bad ka jingjai jai, bad ki ruh kin shim ïa ka bynta kaba kongsan bha hala ka jong ka bor” ula ong.
U Bah Saiñkupar ula pynpaw ba ka HNLC ka ai khublei ruh ïa ka Khasi Jaintia Church Leaders Forum (KJCLF) kaba wan shakhmat ban pynpaw ïa ka jinglong ba kloi ban iadon bynta lang ha ka jingïakren iasuk.
“Ka HNLC ka kyrmen ba kane ka sienjam khlem pep kan wanrah ïa ka jinglong jingman kaba sngewtynnad ha kaban rah ïa ki kam sha ka miej ïakren iasuk ha ka lynti kaba biang eh” ula ong.
