Nongpoh, Jylliew 05: Ka Bharat Tibet Sahyog Manch Meghalaya ryngkat ka Ri Lajong Farmers Produce Organization Ri Bhoi ha ka sngi Saitjain ka la rakhe ïa ka sngi pynneh mariang kaba long shi bynta ban ai jinghikai sha ki paidbah halor ka jingdonkam ban kunai ne sumar ïa ka mariaing kaba long ka jingma na kata ka jingkylla ka mariang kaba dei na ka daw ka jingpynjot pathar ïa ka mei mariang.
Ka Bharat Tibet Sahyog Manch, Meghalaya ha ka jingïalam u President, u Paralad Toor bad ka Kong Marian Maring ryngkat ka Kong Rita Lyngdoh kum ka Secretary ki la pynlong da ka jingthung ïa ki symbai dieng soh bad ki kymbat dawai ha Ri Bhoi College bad kumjuh ruh ha Pahamsohthri ha kaba haduh 200 tynri ki tynrai soh bad ki kynja kymbat dawai ki la thung ban pynneh pynsah ïa ka mariang.
Kiwei kiwei ki dkhot ha kajingdon lang u Bah Lukas Maring, ka Kong Easterday Laloo bad ki dkhot ki la mih ryntih ban thung ïa kitei ki tynrai soh dieng bad ki kymbat dawai bad ki la shim ruh ka rai ban dang bteng ïa ka kam na ka bynta ban pynneh pynsah ïa ka mariang.
Haba kren ruh halor kane ka jingpynlong ïa kane ka jingrakhe ïa ka sngi pynneh mariang, naduh u Paralad Toor bad kitei ki nongïalam kitei ki seng ki la ong ba ka jingrakhe ïa kane ka sngi pynneh mariang kam dei ban long tang shisien shisnem, hynrei kum ki nongshong shnong kiba don ka jingkitkhlieh ïa ka mariang ki dei ban don kata ka mynsiem ban sumar ïa ka mariang na ka por sha ka por bad lada don hi kata ka jingïatrei lang ngin lah shisha ban pynneh pynsah ïa ka mariang kaba dei kawei na ka jingma kaba k briew ha kine ki sngi ki la pynjot pathar ïa ka mariang khlem da pyrkhat ïa ka pateng ban sa wan jong ka ri bad ka jaid bynriew.
