Jowai, Naitung 19: Ki dkhot nongkitkam ka Shnong Chilliang Raij Jowai hapoh ka jingïalam u Waheh Shnong ma D.H. Pde lem bad kiwei de, kumba juh leh na ka por sha ka por mynta ka sngi saitjaiñ kila pynlong biang ïa ka jingthung dieng ha Riat Turiem harud lynti bah Jowai-Shillong.
Ha kaba ha kane ka sngi kila ïah ban thung haduh kumba 150 tylli ki tynrai dieng kiba kynthup ïa ki jait tynrai dieng kum ki Champa, Rtiang, Puma, Satew, Dieng-doh, Sohphie (Saphai) bad kiwei de ki jait dieng, u ma Pde ula ong ba kane ka long kum kawei na ki dak ka jingsngewnguh ïa ka Mei Mariang kumjuh ruh ïa ki trai jaka kiba la ailad bam pom ïa ki dieng jong ki ha ka por Behdieñkhlam.
Shuh shuh u ma Pde ula ong ba kane ka jingshim bynta ka jong ki ban thung ïa ki tynrai dieng ka long ruh kum shi bynta ban ïasnoh kti lang bad ka World Environment Day. Ha kajuh ka por ruh ka long ka kamram ki nongshong shnong ban kheiñ kor ïa ka mariang ban ïada ïa ka Mei Mariang, namar kumba long mynta la ïohi ïa ka jingshah lehbeiñ bad pynjot ïa ka mariang ha kiba bun ki liang.
Kumta u ong kane ka long kum ka nuksa kaba rit kum kita ki nongshnong shnong kiba don kata ka jingkit khlieh bad ban pyrkhat na ka bynta ka lawei jong ki ban dang wan.
