Nongstoiñ, Nailur 29: Na ka bynta ban pynphuh pynphieng bad pynitynnad ïa ka surok Nongstoiñ by pass, ka Eco Regreen Multipurpose Cooperative Society kawei na ki kynhun trei mon sngewbha, ha ka sngi saitjaiñ ba la dep ka 27 tarik, ka la pynlong ïa ka programme ba kyrpang ha kaba ki nongïalam bad ki dkhot jong ka Society, ki la hiar sha ka surok Nongstoiñ by pass ban thung dieng ha baroh shilynter da kaba sdang na Mawrusyiar ter ter sha phang sepngi.
U bah Reddyfernady Sun nongïalam ba hakhmat jong ka Society haba pyntip ha u nongthoh khubor, u la ong ba ka jingthmu ba kongsan jong ka kynhun ban thung dieng ha baroh shilynter ki rud jong katei ka surok, ka long ban pyniphuh iphieng bad ban pynitynnad ïa ki paitbah nongleit nongwan kiba ïaid lyngba katei ka surok.
Utei u nongïalam u la ong ruh ba nalor ka jingthung dieng ha shilynter ki rud surok, ka long ruh ka ïada ruh ïa ka jingtwa jong ka khyndew bad ka pynmih ïa ka lyer kaba khuid kaba pyngngad ïa ki nongshong shnong kiba ïaid ba ieng.
