Thud ki khynnah skul ba shong ki Pulit Meghalaya ha ïing skul Presbyterian Umwali
Pynkloi ka jingpynbeit pud ha Langpih Sector: FKJGP
Nongstoiñ, Nohprah 12: Namar ka jingpynsahteng jong ka sorkar ban pynbeit ïa u pud u sam jong ki jaka kiba hap ha ka Langpih Sector, ki nongïalam jong ka Federation of Khasi Jaiñtia and Garo Peoples (FKJGP) Ri Muliang Circle ki la leit ban ïakynduh ïa u Deputy Commissioner jong ka West Khasi Hills District u Bah Garod L.S.N Dykes ryngkat ka jingthoh ban kyrpad ba un pykynmaw biang ïa ka Sorkar Jylla lyngba ka Regonal Committee on Border Dispute ba kan pynkloi noh ban pynbeit ïa u pud u sam.
U President jong ka seng u Bah Serbilin Lyngdoh haba kren sha ki lad pathai khubor hadien ba ki la mih na ka kamra treikam jong u Deputy Commissioner, u la ong ba ka jingpynslem jong ka Sorkar ban pynbeit ïa u pud u sam ha ki jaka kiba hap ha ka Langpih Sector ka la pynartatien bad pynduh jingkyrmen ïa ki paitbah namarba ki la kwah dik dik ban tip la ki shnong ki thaw bad ki jaka kiba hap ha ka Langpih Sector kin ngat sha Assam ne kin dang neh ha Meghalaya.
U la ong ruh ba kumba ka Sorkar Jylla ka ladep ban ïasoi ïa ka soskular ha kaba ïadei bad ka jingpynbeit pud ha ka wat ba nyngkong kumta ka dei ban pynkloi noh ban pyndep ïa ka jingpynbeit ïa ki jaka ki puta kiba dei ha ka wat kaba ar kata ka Langpih Sector.
Related Posts
U la ong ruh ba ki paitbah nongshong shnong jong ka thaiñ ki la pynsngew ha ka seng ba lada ka Sorkar kan pynslem kumne kan poi ka por ba kim banse ban pynlong da ki jingïakhih pyrshah ïa ka sorkar.
Ha kajuh ka por u nongïalam ka seng u la ong, kumba ka long haduh mynta baroh ki nongshong shnong Khasi bad Garo kiba shong ba sah ha ki shnong jaka kiba hap ha ka Langpih Sector ki kwah ban sah beit ha Meghalaya.
Nalor kata ka seng ka la pynsngew ruh sha u Deputy Commissioner ba un pynsngew sha ka sorkar ba kan pynbiang noh ïa ka jaka sah jong ki Pulit ha ka shong Umwali namarba haduh mynta ki dang shu shong ha ka ïing skul jong ka Balang Presbyterian Umwali bad ka jingsah jong ki Pulit ha ka ïing skul ka pynthud shibun ïa ki khynnah skul.
Ka seng ka la kyrpad ïa u Deputy Commssioner ba un pynsngew sha ka Sorkar ba kan shimkhia bad ban shna noh da ka jaka sah kaba kyrpang na ka bynta ki Pulit kiba don ha Umwali.