Thud ka Network Jio man ka por bad buh Tower khlem pyntrei kam ka company jio ha Phlangwanbroi

Mawkyrwat, Ïaïong 19: Ka Khasi Students’ Union (SKU) jong ka Malai Sohmat Area Unit unit ka pynpaw ïa ka jingbitar halor ka jingbym pyntrei kam ïa u Tower Jio ha Phlangwanbroi bad ïa ka jingkheiñ sting ka company ha ka ban pynbiang ïa ka network ha kine ki sngi ka don ka jingthud ba man ka por ha kaba ïa dei bad ka Network.
Ha ka kyrwoh na u samla Denishan Iawrod, President ka Malai Sohmat Area Unit la ong ba ka jingbuh ïa u Tower Jio ha Phlangwanbroi ka long kaba sep ei bad long leh noh ei namar haduh mynta khlem pyntrei kam satia bad dei na kane lehse kaba la pynlong ruh ïa ka jingthud ka network jio ha kine ki sngi bad kum ka seng ka pynpaw ïa ka jingsngewkhia halor kane namar ki ïohi hi ba ka network ha kine ki thaiñ ka tlot palat bad kane ka pynduh nong ïa shibun ki nong pyndonkam bad kane ka ktah ïa u paidbah naduh ki skul, ophis bad kiwei kiwei.
Namarkata, ka seng ka kyrpad ïa ka Jio Company bad kan peit bha ïa kane ka bynta bad ha kajuh ka por ba kan pyntrei kam noh mardor ïa u Tower ha Phlangwanbroi khnang ba ka network kan biang noh ha kine ki thaiñ namar kumba long mynta ka thaiñ ka kynduh jingeh bad kordit bad ki paidbah ki la ud na ka jingbym biang ka network bad ki da kwah ba ka network kan biang bha kat kum ka juk mynta.
Kumta, ka company ka dei ban shim khia ïa kane ka bynta lada kim lah ban shim khia ïa kane ka bynta, ka seng kam banse ban shim da kiwei pat ki sienjam ba kham tyngeh.