Thrang ki paidbah ban shna surok noh na Nonglang sha Rambrai

Nongstoiñ, Jymmang 31: Ka surok ka dei ka mat kaba hakhmat duh kaba ki paidbah nongkyndong ki angnud haduh katta katta ba ka sorkar ka dei ban pynïoh. Ka jingdon jong ki surok ka dei ruh ka lad ban kyntiew ïa ka kamai kajih, ka ïoh ka kot bad ka pynsuk ïa ka leit ka wan jong ki paidbah ha ka por ba ki don kam.Haba phai ha West Khasi Hills dang don shibun ki jaka kiba ki surok kiba pynïasoh ïa kawei ka shnong sha kawei pat ki dang duna haduh katta katta. Ka Rambrai Jyrngam Constituency ka dei kawei na ki Constituency kiba dang donkam haduh katta katta ïa ki surok namar ka dei ka Constituency kaba baroh shilynter ka ïakhap bad ka Assam.Ki paidbah jong katei ka Constituency haba ki leit donkam ïa ki nongmihkhmat kum ha Rambrai ki hap ban ïaid lyngba ïa ka Mawshynrut Constituency bad ka Nongstoiñ Constituency haduh ban da poi sha Rambrai. Na ka bynta ban wanrah ïa ka jingsngew jan hapdeng ki paidbah jong ka Constituency bad ki nongmihkhmat, ka surok na Rambrai shaduh Nonglang ka dei kaba ka sorkar ka la dei ban leh ei ei na ka bynta ban pynïoh noh kham kloi ïa ka surok na Rambrai sha Nonglang lyngba ka shnong Mawrok Thiepkseh.Lada la pyntrei ïa katei ka surok, kan long ka jingkyrkhu kaba khraw ïa ki paidbah namar na Rambrai sha Nongstoiñ ka jingjngai ka long 20 kilomitar na Nongstoiñ haduh Nonglang ka long 36 kilomitar bad lada kheiñ lang ka long sanphew hynriew kilomitar, hynrei na Rambrai sha Nonglang ka jingjngai ka long tang kumba 18 kilomitar.