Nongstoiñ, K’lyngkot 03 : Ka surok na Nongstoiñ shaduh Sohpian kaba jngai tang kumba hynñiew kilomitar, ha kine ki sngi ka sah satang u budlum bad ym idei shuh ba ka dei ka surok kaba ki kali ba kit ïa ki nongleit nongwan ki dang dei ban ïaid, namar tang ban ïa kiar para kali rit ym don jaka shuh namar baroh arliang ka surok ki la long kum ka kharai.
Ha kaba ïadei bad katei ka surok, dang ha u bnai Risaw jong u snem ba la dep, u bah Prestone Tynsong Symbud Myntri Rangbah ka jylla, u ba peit ruh ïa ka tnad PWD, ha ka jingwan jong u ha Nongstoiñ u la kular ba ka sorkar kan sa mang pisa haduh 22 klur tyngka ban shna bad pynheh ïa katei ka surok.
Hynrei, na ka liang ki nongñiah kali bad ki paitbah haba ïakren bad u nongthoh khubor, ki la ong ba kat haduh ba ka sorkar kan da pynbit pynbiang ïa ki jingdon kam shuwa ban khot tender na ka bynta ban shna ïa katei ka surok, ka lah ban jia wat ka jingïatyngkhih kali haduh ban da duh ei wat ki mynsiem briew ruh.
Kumta na ka bynta ba ki nongñiah kali bad ki paitbah nongleit nongwan kin lait na ki jingmynsaw, ka sorkar ka la dei ban phah pyndap khyndew shuwa ha baroh arliang jong ka surok. Lane lada kam lah ban leh kumta ka la dei ban bthah ïa ki bor pynïaid district jong ka West Khasi Hills, ba kin pynmih da ka hukum ba dei ban shah tang ïa ki kali kiba kiew na Nongstoiñ.
Katba kiba hiar sha Nongstoiñ pat ki dei ban hiar lyngba ka National Highway sha Mawrusyiar shaduh Nongstoiñ. Nalor kata ki la ong ruh ba dei ba buh da u pulit pynïaid kali ha Sohpian lane buh da ki jingpyni dak kum ka No Entry khnang ba baroh ki nongñiah kali kin tip.
Kumjuh ruh, halor ka jingsniew bad jingrit palat jong katei ka surok, na ka liang ki nongñiah kali bad ki paitbah ki la dawa na ka sorkar ba ka dei ban phah pyndap khyndew ha baroh arliang jong katei ka surok, khnang ba ki kali kin ïoh jaka ban kiar para kali.
