Thong ka sorkar kmie ban pynïoh bording manla ki thliewïing
Lyngba ka skim Saubhagya haduh 506 tylli ki shnong ha WJH kiba ïoh myntoi: Wailad
Jowai, Naitung 29: Shi bynta na ka jingrakhe ïa ka jingdap 75 snem ka jingïoh laidluid ka Ri India ne ka ‘Azadi Ka Amrit Mahotsav’, na ka liang ka Ministry of Power and Renewable jong ka sorkar kmie ha ryngkat ki bor pynïaid District jong ka West Jaiñtia Hills mynta ka sngi kila rakhe ïa ka Bijli Mohaysav hapoh ka lama jong ka ‘Ujjwal Bharat, Ujjwal Bhavishya Power @ 2047’ kaba la long ha Chutwakhu Indoor Sports Hall-Cum- Auditorium Jowai.
Kane ka prokram ka long kyrpang ba ka bynta ban ai jingtip sha ki khynnah skul bad ki nongshong shnong ka District ha kaba ïadei bad ka jingpyntreikam ïa ki skim bording bapher bapher kiba wan ka sorkar kmie.
Ka thong ba hakhmat eh jong kane ka prokram ka long ban pynïoh bording sha manla ki thliewïing jong ki nongshong shnong ka ri, la ïathuh u bah G. Nongkynrih DGM (E/M) NEEPCO & Nodal Officer. Ula ong ruh ba kane ka prokram hapoh ka District la pynlong ha ki ar tylli ki jaka kata ha Amlarem bad Jowai. Kane ka long ruh shi bynta ban lum jingkhieñ halor ki skim bala dep pyntreikam.
Ha ka jingïalang la ïoh ïa ki kyntien pdiang da ka kong D.D Syngai MCS Additional DC, ha ka jingdonlang u MLA ka Jowai ma Wailadmiki Shylla kum u kongsan, u P.K Boro MCS i/c DC, ki ohisar na ka tnad MeECL, ki ophisar sorkar, ki nonghikai lem bad ki khynnah skul.
La pynsngew ruh na ki ar ngut ki nongshong shnong shaphang ki jingmyntoi kaba kila ïoh na ka skim bording bad mynta kila lah ban pyndonkam ïa ka bording hapoh ki ïing ki sem jong ki ym kumba long ha ki por mynshwa.
U MLA ka Jowai ma Wailadmiki Shylla haba ai jingkren ula ong ba ka sorkar India kaba wanrah ki skim bapher bapher ban ai jingshai ïa ka ri hi baroh kawei, kumba long mynta hapoh ka jylla kala poi 90 % ki shnong kiba ka ïoh ïa ka bording bad lyngba ka Integrated Power Development Scheme (IDPS) la lah ban buh ïa ki Sub-Station kum ha Khliehtyrshi bad ha Soomer Sabah.
Shuh shuh ula pyntip hapoh ka skim Deen Dayal Upadhyaya Gram Jyoti Yojana kila don haduh 43 villages bad 2902 ki nongïoh myntoi, katba na ka skim Saubhagya la lah ban pynïoh bording tang hapoh West Jaiñtia Hills haduh 506 tylli ki shnong bad haduh 29,068 ngut ki nongïoh myntoi na kane ka skim, ula pyntip ba ka sorkar kan sa sdang sa kawei ka skim kaba la tip kum ka Revamped Distribution Sector Scheme (RDSS) ban pynïoh bording sa kito ki shnong kiba dang sah khlem pat pyndep na ka skim Saubhagya.
Ula ong kumba long mynta ka sorkar jylla ka ïa kynduh shibun ki jingeh ha kaba ïadei bad ka jingpynbiang bording namar ka jingduna palat ka jingpynmih bor ding dalade, ka sorkar jylla kala hap ban shi ram na ki Company bapher bapher, ula pynsngew la donkam ban wad noh ki lad ki lynti ban pynmih ïa ka bording hapoh ka jylla lyngba ki wah, ki mar poh khyndew bad ki bor jong ka mariang.
Ula kyntu ruh ïa ki nongshong shnong ba kin mih shakhmat ban shim kabu ïa ka skim bapher bapher ba la pynbna lyngba ki Website jong ka sorkar bad kum ki khynnah skul ki dei ban wad bniah kymjuh ïa ki kam ki jam, ka rukom siew bai bording bad kiwei de na ki Website sorkar.
Kum ka dak ban burom ïa ki khlawait ka ri ha kane ka prokram la wah ruh ïa ki dur bad ki jingthuh shaphang jong u Who Kiang Nangbah, la pynphuh shuh shuh ïa kane ka sngi da ki jingshad tynrai na ki khun samla bad ka jingleh Skit hapoh ka jingpynïaid u Ladwan Dkhar bad ka kynhun jong u. Katba ïa ki kyntien ai khublei la ïoh na u T.S Rymbai Executive Engineer Jowai Distribution Division, MePDCL.