Thombor ki Muslim na Bangladesh ïa ki Khasi ba sah ha Cachar District mynsaw 2 ngut ïoh kem 2 ngut

Shillong Nailar 17: Ar ngut ki Khasi kiba sah ha ka shnong Kalakhal kaba hap ha Cachar District, Assam kila mynsaw jur na ka jingshah hiar thma ha ki runar Muslim kiba suba jur ba ki dei ki nong Bangladesh.
Kane ka jingjia kala jia ha ka 15 tarik u Nailar, katba 6 ngut ki Khasi ki dang leit sha ka bri kwai bri tympew, hynrei ha ka jingbym poi pyrkhat ki muslim na Bangladesh kiba la rah ïa ki tiar pynmynsaw, kila wan thombor ïa ki.
La ïathuh ba ha ka 15 tarik u Nailar, katba 6 ngut ki Khasi ki dang leit sha bri kwai, bri tympew, 25-30 ngut ki Muslim na Bangladesh kila wan hiar thma kynsan bad kila ïoh ban tied bad pynmynsaw ïa ki 2 ngut katba ki 4 ngut kiwei pat kila ïoh phet da ka said bad lait na ka jingma.
Ki 2 ngut kiba la mynsaw jur ki kynthup ïa u Raju Kasar bad u Vikash Synkor kiba na ka shnong Kalakhal bad kine mynta ki don hapdeng ka jingshah sumar ha Sichar Medical College & Hospital.
La ïathuh ba kane ka jingshah thombor ki Khasi kam dei tang mynta hynrei kadei kaba la ju jia man la ka por bad mynta ki paid Khasi kiba sah ha Kalakhal ki dap da ka jingtieng bad jingsyier namar ka jingbyrngem byrsit jong ki Muslim na Bangladesh kiba la wan ban kyntur pud be-aiñ ïa ki jaka jong ki Khasi.
Na ka liang ki bor pulit bad bor synshar district jongka Cachar District ki la pynthikna ban shimkhia ïa kane ka jingjia bad 2 ngut ki briew kiba donkti ha ka kam thombor kila shah kem.