Thombor ka Shnong ïa kawei ka longïing ha Ri Bhoi

Nongpoh, Jylliew 30: Ha kawei na ka jingjia shah thombor ka longïing ha Ri Bhoi bad kaba la jia la kham slem naduh u bnai Kyllalyngkot mynta u snem, kawei ka longïing ka la mad ïa ka jingsngewsih khtang hadien ba ka bor shnong ka la thombor pyrshah ïa katei ka longïing da kaba kynnoh ba kam dei ka nongshong shnong ba pura katei katei ka shnong.
Kane ka jingjia ka la jia ha ka Shnong Pathordaro ba hap ha Phatharkhmah Police Outpost ha Ri Bhoi bad kane ka longïing kaba la mad ïa kane ka jingjia ba shah thombor ha ka bor shnong ka dei ka longïing jong ka Kong Regina Marbaniang.
Kumba la ioh lum jingtip da u Mawphor, kane ka jingjia shah thombor ka la pynlyngngoh ruh ïa katei ka longïing ba ka bor shnong ka la kynnoh ïa katei ka Longkmie ba kam dei satia ka nongshong shnong ba pura ka Shnong Pathardaro bad kam don hok ban shong ban sah ha katei ka shnong.
Haba la ioh ban ïa kren bad u Mawphor, wat la kane ka jingjia ka la jia naduh u bnai Kyllalyngkot jong une u snem, kane ka Longkmie wat la ka duna ha ka liang ka jingnang jingtip bad kaba long ruh ka longïing baduk ka kwah ban ioh ïa ka jingbishar bahok bad dei lyngba ki kam thombor ka shnong la pynlong ïa ka ba kan leit ban ujor ne pyntip sha ki bor pulit ka Patharkhmah Police Outpost ban leh ïa kaba donkam katkum ki kyndon jong ka aiñ.
Ka la ïathuh ba ka nongïalam shnong bad ki nongshong ka Pathardaro ha ka jingïalam u Rangbah Shnong, u Bah Opos Mawnai ha ka 24 tarik u Kyllalyngkot 2022 ki la wan sha ka jaka shong jaka shong jaka sah jongka bad kaei kaba la pynsngewsih kthang bha ïa ka kum ka longïing ba kitei ki nongïalam bad ki riew rangbah ki la pynjot naphang ïa u kwai bad u sohtrun ba ka la rep bad thung na ka bynta ka jingmyntoi jong ka ïing ka sem.
Ka la ïathuh ruh kane ka jingwan thombor jong ki ruh kam don nongrim hangno hangno ruh bad kaei kaba ki la pynpaw ka long ba kam dei ka nongshong shnong ka shnong Pathordaro wat la ka dei kaba la pun la kha ha katei ka shnong kaba la pynkha shnong na ka Shnong Umkynsir.
Ka la bynrap ruh da kaba ong, nalor ba ki la wan ban pynjot ïa kitei ki jingthung jingtep jongka da kaba kynnoh ba kam dei ka nong shong shnong katei ka shnong ba ka hap ban mih noh na katei ka shnong, kane ka bor shnong ka la pynduh ruh wat ïa ka umkor ba la tan um sha ka ing jongka lyngba ka skhim Jal Jivan Mission.
Dei halor katei ka jingshah thombor ha katei ka shnong, kane ka Longkmie ka la ong ruh ba ka da sngewsih khtang halor kane ka jingshah thombor, ha kaba kum ka nongshong shnong kam ju pyrshah ïa ki kam shnong ki kam thaw bad namar kane ka jingleh thombor ka la hap ban pyntip sha ki bor pulit ha kaba ïa kane ka kam mynta ka dang don hapoh ka jingbishar ka ïing bishar ka District and Session Judge ha Nongpoh ban ai ïa ka jingbishar kaba hok, ka la bynrap.