Nongstoiñ, Jylliew 4: Katba nang mih ki sngi ka jingshah kynnoh jong ki rangbah shnong Umwali ba ki thom bor ïa ki kper ki phrah bad ki jingthung jingtep ka dang ïai bteng. Katkum ka jingïathuh jong ka kong Kwistilda Lyngdoh Marshillong kaba dei ka hynmen jong u bah Piousding Lyngdoh Marshilong na katei ka shnong, ka la ong ba ha ka sngi palei ka shi tarik jong une u bnai Jylliew ha ka por kumba saw baje janmiet, katto katne ngut ki samla shnong ki la wan ha ïing jong ka bad ki la ong ba balei ka leit rep leit riang ha ka jaka jong ka shnong.
Ka la jubab ba katei ka jaka ka dei kaba ka la rep la riang la bun bun snem. Wat ha u snem 2019 haba ki pulit Assam ki la wan ban thombor, ma ka bad kiba haïing hasem ki la ïakhun tyngeh ban ym ailad ba kin knieh ïa katei ka jaka, namar ba ki jingthung jingtep kum ki kait, ki diengsoh ñiamtra, ki sying, phandieng bad kiwei kiwei ki jingthung ki la don bad ki la rep la riang bad kumno ki wan ban kam ba ka dei ka jaka jong ka shnong.
Ka la ong ruh ba hadien kata ki la wan sa katto katne gnut ki rangbah shnong bad ki la dawa ba kam dei ban leit thung leit tep, leit rep leit riang ha ryngkat ka byrngem byrsit ïa ka ba lada kam pyndem ne leit pynkynriah noh ïa ki jingthung jingtep kin ym shah bad kin jynrat naphang.
Dei tad haduh ka por san baje janmiet ba ma ka bad kiba ha ïing ha sem ki la leit sha katei ka jaka rep bad ki la lap ba shi kynhun ki samla bad ki rangbah ki la don ha katei ka jaka rep bad ki la pynjulor lut ïa ki jingthung jingtep, ki la jynrat lut ïa ki synsar, pynkyllon ïa ki dieng soh bad daiñ lyngkhot lyngkhai da ki wait. Ha katei ka por kim shym la nud shuh ban ong ei ei namar ba kitei ki briew ki la dep byrngem byrsit lypa naduh na ïing.
Katei ka longkmie ka la ong ruh ba dei tad ha ka sngi kaba bud ba ka la leit ban mudui da ka ejahar ha Langpih Border Out Post bad ki pulit ruh khlem da pynslem ki la wan ban sorjamin ïa katei ka jaka bad ki la lap ïa ka jingshisha ba ïa ki dieng soh ki la pynkyllon lut, ki synsar ki la phut bad bret kat ha ba lap bad kiwei iwei ki mar rep ki la julor lut.
Kumban pynkynmaw ba lai taïew mynshuwa katei ka juh ka kynhun ba la ïalam da ki rangbah shnong ba la ïalam da u bah Teiborlin Nonglang u ba dei u sordar jong ka shnong Umwali bad ka kynhun kiba u la ïalam, ki la ïalam da ka puh shilum sha ka jaka rep jong u bah Piousding Lyngdoh kaba don ha Domïingmasi bad ki la pynjot naphang ïa ki jingthung jingtep bad ki la byrngem byrsit ïa u bad baroh kiba ha ïing ha sem.
Na ka liang u bah Piousding Lyngdoh bad kiba haïing ha sem ki la leit ban mudui da ka ejahar ha Langpih Border Out Post, hynrei ki pulit kim pat kem satia ïa kitei ki briew bad dei na katei ka daw imat ba ki dang ban ïai bteng ïa ki kam thombor ïa ki kper ki phrah jong kitei ki longïing haduh mynta.
Katei ka jingleh jong katei ka kynhun jong ki rangbah shnong, ka la pynsngewsih kthang ïa kitei ki longïing kat haduh ba ki la ong ba katei ka kynhun kam dei shuh ka kynhun ki briew hynrei ka la dei ka kynhun jong ki hati khlaw. Namar lada ka dei ka kynhun ki briew ki la dei ban don ka mynsiem ïatip lem lane ka jinglehraiñ ïa ki para briew, namar ka long kaei kaei ka bym lah ban pdiang ba ki briew kin pynjot ïa ki mar rep mar riang ne pynjulor ïa ki jingdon jing em.
Ka la ong ruh ba lada ki lap ba kitei ki longïing ki leh ïa kano kano ka kam kaba long pyrshah ïa ki aiñ shnong aiñ thaw ne ïa ka imlang sahlang, ki la dei ban wan ïakren ne khot ha khmat ka dorbar ban ïa pynbeit. Hynrei ïa kata kim shym leh satia ki shu pynjot beit ïa ki jingthung jingtep bad katei ka jingleh ka long ka bym kah ban pdiang ha ka imlang sahlang.
