Shillong, Nohprah 19 : San ngut ki nongshongshnong ka shnong Umniuh Tmar, East Khasi Hills, kila shah lute ha ki nonglute kiba kiew na Bangladesh katba ki dang thmu ban leit peitkai ïa kawei ka jingkieng ba dang shu dep shna thymmai ha kawei ka wah ha ka thaiñ Khappud.
Kane ka jingkieng ka dei kaba dang shu shna halor ka wah Mawkylla kaba pynïasoh ïa ka shnong Umniuh Tmar bad ka Nongjri.
Kat kum ka khubor ba ïoh lum, kine ki 5 ngut ki kynthup ïa 4 ngut ki kynthei bad uwei u shynrang.
La ïathuh ba kine ki 5 ngut kila leit sha kane ka jaka da ka kali hynrei haba poi ha kawei ka jingkieng kaba rit, ki tei ki nonglute kila khang ïa ka lynti ïaid da ki dieng bad ki maw bad mar kumta hi, kumba 4 ngut ki nonglute na Bangladesh kiba rah da ki wait bad nar rod, kila thombor bad phah sei lut ïa baroh ki jingdon jingem.
Kine ki nong Umniuh Tmar kila leit ban ujor ejahar ïa kane ka jingjia ha Pynursla Police Station bad pyntip ba kine ki nong lute kila lute ïa lai tylli ki mobile phone, kawei ka tablet bad shijur ki sohskhor ksiar.
Ki Nongialam Shnong haba ïoh jingtip ïa kane ka jingjia, kila pyntip sha ki Pulit bad ryngkat lang, kila ïahiar sha katei ka jaka ban pynlong ïa ka jingtohkit.
Lah ban kdew hangne ba katei ka jaka kaba ki nong Bangladesh ki pyntriem ka dei kaba jngai tang kumba 1km na ka jaka ba ker sainar shiah.
