Shillong, Risaw, 12: U MP ka Rajya Sabha u Prof. Rakesh Sinha ha ka sngi Balang u la phah da ka jingthoh sha u Myntri Rangbah ka Jylla u Conrad Kongkal Sangma ban pynkynmaw ha kaba ïadei bad ka jingpynsdang ban shna noh ïa ka surok kaba pynïasnoh naduh ka shnong Kongthong shaduh ka shnong Sder kiba hap hapoh ka East Khasi Hills District.
Ka Shnong Sder, Mawmang bad Mawsohmat ki dei ki shnong ki bym pat don surok haduh mynta mynne bad ki paidbah jong kine ki lai tylli ki shnong ki ïakynduh mawsiang bha ha ka leit ka wan, ha ka rah ka rong bad khamtam eh ha ka pang ka shitom.
“Nyngkong eh, nga ai khublei ïa ka jingïatreilang jong phi ban theh ïa ki song pynroi ha ka shnong Kongthong, ka shnong kaba la bna nam ha ka jingrwai kynud ïawbei ha East Khasi Hills District, ïa kaba nga la shimti hapoh ka Saansad Gram Adarsh Yojana,” ong u Prof. Sinha ha ka shithi ba la phah sha u Myntri Rangbah.
“Ka jinglong tynrai ka la khring ïa ki paidbah na kylleng ka pythei. U Myntri Rangbahduh ka ri jong ngi u Narendra Modi u la pynmih haduh arsien ïa ka shnong Kongthong ha ki jingai jingkren jong u. Nga la shimti ïa ka shnong Sder, Mawmang bad Mawsohmad ha East Khasi Hills District. Nga la leit jngoh ïa ka shnong Mawmang da kaba ïaid kjat jin haduh ar kynta leit bad wan. Kine ki shnong ki dei ki bym pat pynïasoh da ka surok lane kino kino ki lad ban pynsuk ïa ka leit ka wan,” la pynpaw u Prof. Sinha.
“Nga la shna ïa ka jingpynwandur ban shna ïa ka surok hapdeng ka shnong Kongthong sha Sder. Nga ai khublei ïa phi ba phi la pdiang ïa kane ka jingdawa. Katno katno ki kam ba la sdang ki long ka jingsorjamin ba la pyndep. Hynrei kam shym don satia kano kano ka jingpyntyllun ïa ka kam. Ha ka jingïakynduh ha Delhi, nga la ïasyllok halor kane bad phi la ai ka jingkular ba ïa ka kam yn sa sdang noh shen,” la pynkynmaw u Prof. Sinha ïa u Myntri Rangbah.
“Namarkata, nga kyrpad rit ïa phi ban pyntreikam noh kham kloi bad ba kan long ka jingmyntoi ïa ki hajar ngut ki paidbah nongshong shnong kiba la mad ïa ki jingshah jynjar la katta ki snem,” u la ong.
Dang shen ha ka jinghiar jurip jong ki nongthoh khubor sha ki shnong ka thaiñ war Khatarshnong kaba don sha ki thaiñ Sohra la lap ba ki don haduh 7 tylli ki shnong ba kynthup ïa ka Mawmang, Sder, Maïong, Mawsohmat, Khohber, Warbah bad ka Tluh ki dei ki shnong kiba ym pat don satia ïa ka surok kaba long u budlum jong ka ïoh ka kot bad ka leit ka wan.
Ha ka jingjurip, la lap ba ki nongshong shnong jong kane ka thaiñ ki hap ban ïaid da ka kjat da ki bun kynta ban poi sha ka shnong Kongthong, ka shnong kaba jan tam napdeng ki shnong kiba la poi surok na bynta ban leit siew leit tda ne wat ban leit sha ki jaka sumar wat tang ïa ka jingshitom ba malu mala ruh.
Haba ïakren bad ki katto katne ngut ki paidbah ba ïaleit ïawan lyngba kawei ka lynti ïaid kjat kaba pynïasoh ïa ka shnong Kongthong kaba la don surok bad ki 7 tylli ki shnong kiba haduh mynta kim biang wat ïa ka lynti ïaid kjat ruh ki ïathuh ba kane ka jingbym don surok wat haduh mynta la san phew snem kyntih ka la buh jingeh bha ïa ki paidbah khamtam ban kit marbam bad ban leit shim dawai.
