Shillong, Naitung, 11: U Bah Erwin K. Sutnga uba long u Muktiar ka jylla, u la phah da ka dorkhas ha u Chairman bad sha ki dkhot jong ka 22nd Law Commission of India, New Delhi ban pynpaw ïa ka jingpyrshah ha kaba ïadei bad ka jingthmu ban pynlong aiñ ïa ka Uniform Civil Code.
“Kum ka jubab ïa ka notis kaba la pynmih ha ka 14 tarik, Jylliew, 2023 da ka Law Commission of India kaba pan ïa ki jingsngew jong ki paidbah ka ri India halor ka jingtyrwa ban pynlong aiñ ïa ka Uniform Civil Code, nga phah sha phi ïa kane ka dorkhas ha ka kyrteng jong ki jaidbynriew ritpaid jong ka jylla Meghalaya, ki Khasi, Jaiñtia bad Garo,” ong u Bah Sutnga ha ka dorkhas.
“Kum u nongsaidaiñ uba dang trei ïa ka kam mynta la laiphew snem ka dei ka kamram jong nga ban ïada bad ban batai ïa ki aiñ bad ki riti dustur kiba la don lypa, ïa ki dorbar trai ri bad ka rukom ai jait kmie jong ki paidbah ka Khasi, Jaiñtia bad ki Garo, kiba dei ki lai tylli ki jaidbynriew ba hakhmat eh jong ka Jylla Meghalaya. Ïa kine ki riewlum, la ai jingïada da ka riti Synshar ka ri India,” u la ong.
“Ka jingtyrwa ban pyntreikam da ka Article 44 ka riti synshar ka ri India ban pynlong aiñ ïa ka Uniform Civil Code ka la pynkhih win ba ka thymmei jong ka riti synshar ka ri India khamtam ka hok jong ki riewlum bad ki ritpaid kumba la pruiddak ha ka Part III Fundamental Rights yn sa pyndam noh bad kaba sah kan long kumba shu shah rong ha ka um. Kane ka long namarba ka jingpyntreikam ïa ka Uniform Civil Code ka ïapher bak ly bak bad ka Directive Principles of State Policy kaba don ka thymmei jong ka riti synshar ka ri India kaba ïada ïa ka hok jong ki riewlum bad ïa ki ritpaid bad lada pynjari kan long kum ka jingkhñiot beiñ jong ki heh paid pyrshah ïa ki riewlum bad ïa ki ritpaid ha ka ri India,” u la ong bad bynrap, “ki aiñ ba la don lypa kum ka aiñ ïoh pateng, ka shongkha shongman, ka jingngeit niam, ka ktien ka thyllie, ka riti ka dustur, ka jinglong trai ïa ka khyndew ka shyiap, ka jingai jait kmie kin sa shah pynduh lut namarba ïa ka ai jait kpa la pynrung ha ka Uniform Civil Code. Kane ka Uniform Civil Code , lada ka long aiñ ha ka ri, kan ktah shikatdei ïa ka snap bakyrpang jong ngi ïa kaba la pynneh pynsah da ka riti synshar jong ka ri India.”
U Bah Sutnga u la kdew ruh ïa ki kyndon jong ka Article 244(2) kaba kdew, ïa ki kyndon jong ka Sixth Schedule kaba treikam ha ki jaka riewlum jong ka jylla Assam, Meghalaya, Tripura bad Mizoram.
Ka Table ha ka Para 20 jong ka Sixth Schedule ka pynshai ïa ki jaka riewlum jong ka Meghalaya kum ka Khasi Hills District, ka Jaiñtia Hills District bad ka Garo Hills District.
“Ka jingpynjari ïa ka Uniform Civil Code kan wanrah ïa ka jingpynkylla lut nadong shadong ïa ka thymmei jong ka Riti Synshar ka ri India. Katkum ka jingsngew jong nga, ha ka jaka ba kan wanrah ïa ka jingïatylli jong ki paidbah ka ri India ka Uniform Civil Code kan wanrah pynban ïa ka jingkulmar jingm ut bad ka jingbym ïatylli. Kan pynjot ïa ka ri India kum ka ri ba la pynïatylli da ka jingkylluid mynsiem bad da ka nongrim jong ka jinglaitluid ha ki kam saiñpyrthei bad kam niam jong ka riti synshar ka ri India kumba ka long mynta,” ong u Bah Sutnga.
“Ka jingtyrwa ban wanrah ïa ka Uniform Civil Code ym dei satia ban pyntreikam ha Meghalaya bad ha ki jaidbynriew ai jaitkmie jong ki Khasi, Jaiñtia bad Garo kiba sah hapoh ka ri India katkum ki kyndon jong ka Para 12 A(b),” u la bynrap.
