Shillong, Naitung 21: U MLA jong ka TMC uba mih khmat ïa ka Umroi Constituency u Bah George B Lyngdoh ha ka sngi Palei jong ka 21 Naitung u la pynher da ka shithi sha u Myntri ka sorkar pdeng ba peit ïa ka tnad Pule Puthi u Dharmendra Pradhan ban dawa ba ka sorkar pdeng ka dei ban pynlait noh ïa ka bhah pisa kaba dei ban wan sha ka jylla Meghalaya na bynta ban siew ïa ka tulop ki nonghikai SSA.
U Bah George ha ka shithi jong u sha u Myntri ka sorkar pdeng u la kdew ruh ha u Myntri ïa ka daw ba ki nonghikai SSA ha ka jylla ki la hap ban pynlong ïa ka jingïakhih dsa kaba sah miet ha surok ban dawa ia ka tulop ba san bnai jong ki. Shuh shuh ha ka shithi jong u u kyntu ba ka sorkar kan pynlait nioh ïa ka pisa kaba dei ka bhah jong ka jylla namar kane ka jingset tulop ka sorkar ka ktah ïa ki palat 20,000 ki long iing kiba dei ki nonghikai SSA bad ki nongtrei ha ki skul SSA.
U Bah George u la pan jingshai ruh halor ki daw ba ka sorkar pdeng kam pynlait ïa ka pisa kaba dei ka bhah jong ka jylla.
“Ngim lah ban phah ïa ki nongshong shnong ka jylla ban shu trei dohïap dohksew khlem ioh pat ïa ka bainong kaba ki dei hok ban ioh bad kane hi ka long ruh pyrshah ïa ka hok long briew man briew” kdew u Bah George ha ka shithi jong u
Shuh shuh u Bah George u la kyntu ba la kyntu ruh ba u Myntri u dei ban weng noh ïa kane ka jingeh da kaba pynlait ïa ka pisa ba ka sorkar jylla kan ioh siew ïa ka tulop jong ki bad ba nonghikai SSA kin leit phai biang sha ki kamra klas ban ai jinghikai ïa ki khynah skul jong ki.
