Shillong, Naiwieng, 13: Ka The Martin Luther Christian University (MLCU) ka la pyllait paidbah ïa ka kot poitri Khasi ba la lum thup da i Kong Sbunbha Kharumnuid kaba la ai kyrteng, Umpohliew: Ka Jingshemphang.
Ha ka jingpyllait paidbah ïa kane ka kot poitri, la sakhi lang da u Bah Kitborlang Syiem uba la long kum u kongsan, u Fr. Suresh Kagoo uba la long kum u symbud Kongsan, u Vice Chancellor u Dr A.A. Mao, ka Pro Vice Chancellor ka Dr. Larilin Kharpuri, ka Kong Sbunbha Kharumnuid, ka Editor jong ka kotkhubor The Shillong Times ka Kong Patricia Mukhim, ki nonghikai ka MLCU, ki nongtrei bad ki samla pule.
Ka Dr. Kharpuri kaba pynïaid ïa ka jingïalang ka la ong ba kane ka kot poitri ka Umpohliew: Ka Jingshemphang ka dei kaba la shon ha ka ktien Khasi ha ka sien kaba nyngkong da ka MLCU Press, kaba long kum u mawjam jong ka jingsarong ïa ka skulbah MLCU.
U Fr Suresh Kagoo uba dei u Parish Priest jong ka Jongksha, u la ïasam ïa ki jingkynmaw ba sngewtynnat kaba u la ithuh ïa ka nongthoh bad ïa ka ïing ka sem jong ka naduh u snem 1984. U la batai ïa ka jingïaid lynti jong ka Kong Sbunbha, na ka nongdie jingdie ha surok kaba trei shitom sha ka nongthoh poitri, kum ka khana kaba ktah ïa ka jingïaishah, ka jingngeit, bad ka jingkyrkhu.
Haba kde shaphang ka jingim pule puthi, u la kynthoh ba na ka bynta ki riewstad PhD, ka jingpynmih ïa ka kot ka dei kaba donkam, hynrei ka Kong Sbunbha, watla ka dang duna ha ka jingpule hynrei ka la pyndep ïa kaei kaba ka la kut jingmut ha ki khyndiat snem lyngba ki snem jingpule. U la ïaroh ïa kane ka jingjop kum ka jingpynshisha ïa ka sap bad ka jingkut jingmut jong ka ban poi haduh kane ka thong.
Ka Kong Patricia Mukhim, kaba long ka ka Board Member jong ka MLCU ka la pynkynmaw ïa ka jingïakynduh ïa ka Kong Sbunbha ha iew bad ïa ka jinglong ba sngewrit jong ka. Ka la ïaroh ïa ka nongthoh namar ka jinglah jong ka ban ïohi ïa ka jingitynnad ha ki por khyndiat bad ban thoh ïa ki poitri kiba jylliew bad kiba kren naduh ka dohnud. Ka Kong Sbunbha ka la ai khublei ïa U Blei, ïa ka MLCU Press, bad ïa baroh kiba don bynta ban pynmih ïa kane ka kot. Ka la ïasam ba ïa ka poitri jong ka la thoh ban pynshlur ïa kiwei bad ban pynpaw ïa ka jinglah ban ïakhun bad ki jingsngew jong ka jingim ba manla ka sngi.
Ïa kane ka kot la pyllait paidbah da u Bah Kitborlang Syiem uba dei u MDC jong ka Nongkrem Consituency uba long ruh u samla pule barim jong ka Department of Tourism jong ka MLCU (ha u snem 2012).
U Bah Kikboklang u la ai khublei ïa ka MLCU Press na ka bynta ka jingaiti lut jong ki bad pynpaw ïa ka jingsngewnguh ïa ka jingaiei, ka jinglong ba shisha, bad ka jingtrei shitom jong ka nongthoh.
Ka kot poitri ka Umpohliew: Ka Jingshemphang ka ieng kum u mawjam ha ka jingïaid lynti jong ka MLCU Press ban rakhe ïa ki sur jingrwai ki trai muluk bad ban kyntiew ïa ka jingriewspah jong ka thoh ka tar ha ka ktien Khasi.
