Shillong, Nailar, 06: Ka Khasi Student’s Union (KSU) ha ka sngi Saitjaiñ ka la pynher da ka jingthoh sha u Myntri ka tnat Kam Pohing u Amit Shah, uba long ruh u Chairman jong ka North Eastern Council, New Delhi ban pynneh beit ïa ka ophis jong ka North Eastern Electric Power Corporation (NEEPCO) bad ïa ka jingtreikam jong u Chairman, ki Directors bad CVO na Guwahati sha Shillong.
Ha ka shithi, ka seng ka la pynpaw ba ka sngewthuh ba ïa ka NEEPCO la pynkha hapoh ka North Eastern Council ha u snem 1976. Ïa ka Head Office jong ka NEEPCO la buh ha Shillong da ka jingthmu ban kyntiew ïa ka jingpynmh bording jong ka Thaiñ shatei Lammihngi bad ban kyntiew ïa ka ïoh ka kot jong ki paidbah nongshong shnong ha kane ka thaiñ.
“Ka jingtei ïa ka shlem pynmih bording jong ka NEEPCO kaba 2057 MW, ka pynlong ïa ka Corporation ban long kawei na ki PSU ba janai tam ha kane ka thaiñ Shatei Lammihngi. Ka jingthmu bakongsan jong ka NEEPCO ka long ban pynkhreh, ban kyntiew bad ban pynjanai ïa ka jingpynmih bording,” ong ka Seng.
“Ka NEEPCO ka la long ka kompeni jong ka National Thermal Power Corporation (NTPC) naduh u Lber, 2020. Ka Management jong ka NEEPCO naduh u Lber, 2020 ka la pynkynriah noh ïa ki tnat bakongsan jong ka Corporation sha Guwahati na Shillong da ka jingthmu ban pynjanai ïa ka jingtreikam” pynpaw ka seng.
“Ka long kaba pynsngew lyngngoh ha ka por ba la wan lynshop ka jingpang khlam Covid–19, ka Management jong ka NEEPCO ka la ïakynduh jingeh bad ka jingtreikam na Guwahati hynrei wat ynda hadien ka jingkham hiar ka jingpang khlam COVID-19, ka jingtreikam ka dang ïai bteng hi na Guwahati. Ym don kino kino ki shlem treikam jong ka Sorkar Pdeng kiba la pynkynriah na Shillong ha ka por ba la lynshop ka jingpang khlam Covid-19 hynrei lait noh tang ïa ka NEEPCO,” la ong shuh shuh ka Seng.
Kum ban shu pynkynmaw ba ki nongïalam ka Khasi Students’ Union (KSU) la bun bun sien ki la thmu ban ïakynduh ïa u Chairman bad ïa kiwei kiwei ki Director jong ka NEEPCO hynrei la pyntip ba u Chairman bad ki Director ryngkat bad kiwei kiwei de ki ophisar ki treikam beit na Guwahati. U Chairman barim u V. K. Singh (Retd.) bad u Director (Technical) u Hemanta Deka (Retd.) kim ju kham wan sha Head Quarter naduh ba la thung ïa ki kum u Chairman bad Director (Technical).
Ka Seng ka la kynnoh ruh ba ki Director ki shu long tang kum ki nongwan jngohkai ïa ka NEEPCO Head Quarter ha Shillong. Watla ka seng ka la ïoh jingtip lyngba ki lad pathai khubor ba bun ki shnat treikam jong ka NEEPCO la pynkynriah na Shillong hynrei ki bor pynïaid jong ka NEEPCO ki len ding ding dang dang bad ki da pynshai ruh ba kam don kano kano ka ophis treikam jong ka NEEPCO kaba la pynkynriah na Shillong.
“U Mr. B. Maharana uba bat kum u Director (Finance) u la len ba la pynkynriah ïa kano kano ka ophis treikam na Shillong sha Guwahati ha u bnai Kyllalyngkot, 2022 hynrei katkum ka Office Order no: 1038 dated 25.06.2022 la pynshisha ba ïa ka ophis jong u Executive Director (Operation and Maintenance), ka ophis jong u Executive Director (Contract and Procurement), ïa ka ophis jong u Executive Director (Corporate Project Monitoring) ladep rah sha Guwahati ryngkat bad katto katne na ka Information and Technology (IT) bad Finance.
“Ka long kaba shisha ba ka Management jong ka NEEPCO ka la wai ïa ka iing ha Guwahati da kaba siew baiwai T. 5, 30, 479.00 shi bnai na ka M/s Kamal Jail, Punit Jain, Nikhil Jain bad Biswajit Talukdar naduh u Lber, 2021 watla ka NEEPCO ka don la ka jong ka ophis treikam bapura ha Shillong. Nalor kata, ka NEEPCO ka don ïa ki iing sah jong u Chairman bad ki Director ha Shillong hynrei ïa ka Official Quarter la shu ieh iing jah naduh u snem 2020 da u Chairman barim u V. K. Singh bad kiwei kiwei ki Directors,” la ong ka Seng.
“Kane ka jingpyndonkam bakla ïa ka iktiar bad ïa ka jingpynmih kan pynlut phut ïa ka Corporation ïa kaba yn hap siew da ki paidbah. Ka jingwan jngoh jong u Myntri ka Sorkar Pdeng uba peit ïa ka tnat Bording bad Karkhana Heh, u Krishan Pal Gujjar ha Nongpoh, Meghalaya ka la pynpaw shai ba kam don kano kano ka jingbthah da ka Ministry of Power ban pynkynriah ïa ka ophis na Shillong bad ki Ophisar kin hap ban trei ruh na Shillong.
Ha kaba ïadei bad ka jingkren jong u Myntri ka Sorkar Pdeng ha ka 13.07.2022, ka kynhun jong ki nongtrei ba la kham rim ki la pyngngop ïa u Chairman barim u Mr. V. K. Singh ban pynkynriah ïa ka ophis na Shillong. “Ki sakhi sabut ki pynpaw shynna na ka Office Order no: 1038 dated 25.06.2022 ba u V. K. Singh u la mynjur ban pynkynriah ïa ki ophis treikam ha ka 19.05.2022 shwa ba un shongthait na ka kam. Ka paw shai ba ka Management jong ka NEEPCO ym tang ba ka ïalam bakla ïa ka Ministry of Power, ka Sorkar India hynrei wat ïa ki paidbah jong ka jylla Meghalaya.
Ka jingthung ïa u Chairman, ïa ki Director bad ïa u Chief Vigilance Officer ka long pyrshah ïa ka NEEPCO, HQ, Shillong hynrei naduh u snem 2020, u Chairman, ki Director bad u Chief Vigilance Officer ki treikam beit na Guwahati kaba long kum ka jingpynkheiñ ïa ka Establishment Rules. Ka jingpynkynriah ïa ki ophis jong ka NEEPCO na Shillong sha Guwahati kan ktah ïa ka ïohkam ïohjam jong ki samla ba la nang la stad jong ka jylla Meghalaya, la ong shuh shuh ka Seng.
“Kam don kano kano ka jingthoh ba ïa ka NEEPCO ba la pynkha hapoh ka North Eastern Council (NEC) la pynkynriah sha kiwei kiwei ki jaka na ka jaka ba la don lypa. Namarkata, ban pynkynriah ïa ki ophis jong ka NEEPCO na Shillong ka long ka jingibeiñ ïa ki paidbah bad ïa ka Jylla Meghalaya,” la kynthoh ka Seng.
Ka North Eastern Council ka la trei shitom ha ki san snem baladep bad ki kynhun kum ka NEPA, NEEPCO, NERAMAC, NERIST, RIPAN, NERIWALM, RIMS, LGBRIMH, NESAC, BBCI, RDC, RNC, RIPSAT, CBCT & NETDC la buh ha ki jylla bapher bapher jong ka thaiñ Shatei Lammihngi na ka bynta ban kyntiew ïa ka ïoh ka kot jong ka thaiñ. Ka Seng ka pynpaw ruh ïa ka jingsngew ba ïa u Chairman bad Director (Technical), ka Ministry of Power ka dei ban thung da u CMD bapura bad kumruh ruh ïa u Director (Technical) ba pura ha NEEPCO.
“Kane ka thaiñ ka la ïakynduh jingeh na ka jingkyrduh bording na ka jingshah pynjulor ha ki bor mariang jong ka Kopili Power Station bad ka Khandong Power Station ha Dima Hasao District, Assam. Ïa ka bhah bording ka Meghalaya kam shym la ïoh satia na kane ka Power Station na ka daw ba la hap ban shna pynbha ïa kine ki Power Station.
Ka seng ka kyntu ïa u Amit Shah, ïa u Myntri ka DoNER ban shimkhia halor kane khnang ban pynkynriah noh mardor ïa ki ophis treikam ka NEEPCO na Guwahati sha Shillong..
Ka KSU ka la phah ruh ïa ka jingthoh sha u Union Minister ka DONER u .G. Kishan Reddy sha u Vice Chairman jong ka North Eastern Council, New Delhi bad sha u Union Minister incharge Power, New Delhi u . R. K. Singh halor kane kajuh ka mat jingdawa.
