Thoh ka KSU sha ka NTA ban ïa kynduh jingeh ki samla ban thoh ïa ka CSIR, NET, 2022

Shillong, Nailur, 13: Ka Education Cell jong ka Khasi Students’ Union (KSU) hadien ba ka la ïoh pdiang ïa ki jingud jingnam jong ki samla pule ki ban sa thoh ïa ka CSIR,NET 2022 ha kaba ïadei bad ka jingïoh Examination Centre jong kiba bun ki samla sha kiwei pat ki jylla khamtam ha ka Jylla Tripura, ha ka janmiet jong ka Lah Sngi u Blei ka seng ka la phah da ka dorkhas sha u Senior Director jong ka National Testing agency (NTA) u Dr S. Parashar ban wanrah biang ïa ki Examination Centre ha Shillong na ka bynta ki samla ka jylla Meghalaya.
Ka seng ha u kyrwoh ba la phah da u Chairman ka Education Cell ka KSU-CEC u samla R. Khajana ka la ong, “kumba ka ju long manla u snem ki Centre ki ju long beit ha Shillong ne ha Guwahati bad ki samla ba ïakhun ïa ka eksamin kim ju kham shem jingeh, hynrei ka jingbuh ïa ki Examination Centre ha kane ka kynti shaduh ka jylla Tripura ka la wanrah ïa ka jingsngew artatien na kiba bun ki samla.”
Ka Seng ryngkat ka jingïatrei lang bad ka North Eastern Hill University Students Union (NEHUSU) ka la ïoh ban ïakren lyngba ka Telephone bad ki nongtrei jong ka NTA ha kaba na ka liang jong ki, ki la pynpaw ba ki long kiba kloi ban buh ïa ki Centre ha Shillong lada ki don ki jaka.
Ka Seng ka la ïoh ruh ban pyntip ïa kane da ka telephone sha ka tnat Pule Puthi ka Sorkar Jylla lyngba u Secretary ka tnat Pule Puthi u Ambrose Ch.Marak bad ka seng ka kyrmen ruh ba ka tnat Pule Puthi kan shimkhia ïa kane ka bynta.
Lyngba une u kyrwoh, ka seng ka pynpaw ruh ïa ka jingsngew bynñiaw namar kumba ïa tip lut ïa ka jylla Meghalaya la ju ñiew kum kata ka pdeng jong ka pule puthi (Educational Hub) ha ka thaiñ Shatei Lammihngi hynrei ka long kaei kaei kaba sngewsih pat ba ki samla pule ka jylla kin hap hap ban leit pat sha kiwei ki jylla ban thoh ïa kiba bun ki Entrance Examination khamtam ki eksamin kiba pyndonkam da ki kor Computer.
Ka seng ka la ïoh ruh ban pyntip ïa u Myntri Rangbahduh ka jylla u Conrad Kongkal Sangma bad ïa u Myntri ka tnat Pule Puthi u Bah Lahkmen Rymbui ha kaba ïadei bad kane ka bynta lyngba ka e-mail khnang ba kin dup lah ban shim ïa ki sienjam ban pynsuk ïa ki samla pule.