Thmu thied rem ka MIDC ïa ka jaka ba duna dor ha Umtham, ujor ka RBYWO sha u CM

Nongpoh, Nailar 19: Ka Ri-Bhoi Youth Welfare Organisation ka la ujor syndon sha u Myntri Rangbah ka jylla u Conrad K Sangma halor ka jingthmu thied jaka ka Meghalaya Industrial Development Corporation ha ka shnong Umtham ha Ri-Bhoi District bad na ka liang ka seng ka la ther tyngeh ba katei ka jingthmu thied jaka ka dei tang ka kam bamsap bad pynsyrwa kai ïa ka pisa u paidbah.
Haba phah ïa ka kyrwoh na ka liang u Bah Ban Kharnaior President bad u Bah Kenny Nongrum General Secretary ki la pynpaw ka jingpyrshah jur hadien ka seng ka la ïoh jingtip ba ka sorkar lyngba ka Meghalaya Industrial Development Corporation ka la don jingthmu ban thied ïa ka jaka kaba don ïa ka jingheh kumba 14 akar kaba dei ka jaka jong u Bah Rick Kharkongor, ha ka dor kaba la poi kumba T. 21 klur.
Ha ka jinglap jong ka seng ka dor jong ka jaka ha katei ka thaiñ ka long tang kumba T.150 shi square feet, hynrei ka sorkar ka thmu ban thied ïa ka jaka ha ka dor kumba T.450 shi square feet bad kum ka seng ka pynpaw ïa ka jingsngew lyngngoh ba kumno ka MIDC ka thied rem ïa ka jaka ha katei ka thaiñ, wat haba la tip shai ïa ka dor ka mur jong ka jaka bad kane ka la pynsuba sniew ïa ka seng ba ka lah ban don kaei kaei sha lyndet bad ka jingthmu bamsap.
Namarkata na ka liang ka seng ka la phah sangeh mardor ïa ka jingthmu thied jaka ka MIDC ha Umtham bad ban leh da kaba tyngeh ïa ki ophisar kiba don bynta halor katei ka jingthmu ban thied rem ïa ka jaka ba dang lah ban ïoh ha ka dor ba duna namar katei ka dei tang ka kam bamsap bad ka jingpynsyrwa kai ïa ka pisa paidbah.