Shillong Nailur 24 : U National Vice President ka National People’s Party (NPP) Bah Prestone Tynsong ba dei ruh u Symbud Myntri Rangbah ka jylla ha ka sngi Saitjain u la khyrwit tyngeh ïa ka Bharatiya Janata Party (BJP) namar ka jingkular ban pynïoh Inner Line Permit bad ruh ban pynrung ïa ka Ktien Khasi ha ka Khyrnit kaba Phra jong ka Riti Synshar jong ka Ri tang namarba la jan ka elekshon.
Haba kren ha ka jingïalang jong ki samla NPP kaba long ha Pynursla, u Bah Prestone u la ong ba namar ba la jan ka elekshon, ka BJP ka sdang ban pynmih ïa kitei ki mat ba ka jylla ka dawa kum kawei na ki mat ïaleh elekshon.
“Lada ka BJP ka ieit shisha ïa ka jylla bad ïa ki nongshong shnong ka la dei ban pyntreikam ïa ka ILP bad kynthup ïa ka Khasi ha ka Khyrnit kaba Phra ha shwa ka elekshon ha u 2023,” bynrap biang u Bah Prestone. Shuh shuh u ong ba namarba dei ka BJP kaba bat ïa ka bor synshar ha ka sorkar pdeng kumta na ka liang ka sorkar jylla ka la leit sha Delhi ban kynduh ïa u Myntri Rangbahduh ka Ri u Narendra Modi bad ruh ïa u Myntri Kampohiing ka Ri, u Amit Shah ban pynsngew ïa kane.
“La bunsien ngi la kynduh ha Delhi ban leit buddien halor katei ka mat. Na kata ka daw, lada don elekshon ne ym don elekshon ïa ki ishu jong ka Jaidbynriew ngi shim hakhmat eh khlem thiah khlem dem,” u la ong.
Shuh shuh u ong ruh ba mynta ba la jan ka elekshon, la mih ki ishu bapher bapher ha ki social media la ka long naduh ka jingkynnoh ba don ki high level ba harukom da kaba kynnoh ba dei u Bah Prestone u Conrad ba shim lut ïa u dewiong. “Katno sien nga la ong ba ujor da ka ejahar ha Police Station uei uta ba don bynta ha ka high level ym ban shu kynnoh khlem da don ki sakhi.”
Ha kajuh ka por u la ong ruh ba mynta ba la jan elekshon bun ki party ba donlang ha ka sorkar ki la sdang ban thet kti ïalade haba ïadei bad katto katne ki ishu.
