Shillong, Naitung 13: Ki nongkamai da ki ar shaka kiba ju kamai lyngba ka Rapido mynta ka kynti ki pynpaw ba na ka liang jong ki ki don ka jingthmu ban shna noh la ka jong ka kompeni bad u App uba ia syriem bad u Rapido hadien ba ka sorkar lyngba ka Regional Transport Authority(RTA) lem bad ka ophis District Transport Officer(DTO)
Ïa kane a pynpaw da ki nongïalam ki nongkamai ar shaka haba iakren bad ki lad pathai khubor hadien ba ki la wan ïa kynduh bad u DTO jong ka East Khasi Hills ha ryngkat ka jingsynran lang ki nongïalam jong ka HITO ha ka sngi Balang ki la leit ban ïakynduh ïa u District Transport Officer jong ka East Khasi Hills u Bah D Lamin.
Shuh shuh na ka liang jong ki ki la ïathuh ba ki wan ruh ban buh ka jingkyrpad na ka ophis jong u, ba kan ai noh da ki permit na bynta ki ar shaka ba kin lah ban kamai. Kine ki nongkamai ki la pynpaw ba na ka liang jong ki ki don ka jingthmu ban shna noh da ka kompeni kaba ïasyriem bad kane ka Rapido khnang ba ha kane ka kompeni kin shah tang ïa ki paradoh parasnam ban kamai tang ki la pynpaw ba na ka liang jong ki ki dang hap wad ki buit ki jingstad kiba shemphang ha kane ka kam.
Haba bynrap lang ïa kane u President ka Hynñiewtrep Integrated Terrestrial Organization (HITO) u Bah Donbok Dkhar u la ïathuh ba ka jingleit kynduh jong ki ka long ruh shi bynta ban pan jingshai na une u ophisar halor ka jingpynmih hukum ban khang kamai ïa ki ar shaka. U Bah Donbok u la ïathuh ba kat kum ka jingïathuh u DTO ki dang don tang lai tylli ki kompeni kiba wan pan permit ban kamai ha East Khasi Hills ba kynthup ïa ka Uber, Orchid bad Ropper tangba haduh kat mynta ka ophis u DTO kam pat ai satia ïano ïano ruh u la pyntip.
