Thmu ka Soil and Water Conservation ban aikam tang ha uwei u kontraktor, dawa phiah biang ka RBCSA

Nongpoh, Nailur 03: Ki nongïalam ka All Ri-Bhoi Contractors and Suppliers Association mynta ka sngi ki la leit ban ïakynduh syndon ïa u Divisional Soil & Water Conservation Officer Ri-Bhoi Division hadien ka jingpynlait ïa ka e-tender ban shna ïa ka Water Harvesting Structures kaba la thmu ban ai tang sha uwei u kontraktor bad tang ha kawei ka paket.
Kum ban shu pynpaw ba dang shen ki kontraktor na Ri-Bhoi District ki la lum ruh da ka jingïalang namar ka jingeh ba ki mad na ka jingbym iohkam iohjam bad ïa ki kam ba heh la shu ai beit tang sha kito kiba don jingïadei bad ki heh sorkar bad ki myntri sorkar.
Haba kren sha ki lad pathai khubor na ka liang u Bah Plielad Tiewsoh Vice President ka All Ri Bhoi Contractor and Suppliers Association, u la ong ba kum ka kynhun ki nongtrei kontrak ki dap da ka jingsngewkhia kaba jur hadien ba ka kam ba la pynbna da ka tnad Soil and Water Conservation ha Ri-Bhoi la thmu beit ban ai tang ha uwei u kontraktor kaba don ka jingduhnong kaba khraw ïa kiba bun kiwei pat kiba im jakpoh na katei ka kam.
Kum ka kynhun ki la dawa ba dei ban pynsangeh mardor ïa katei ka kam bad ban tender thymmai biang bad ban phiah khnang ba kan long kum ka jingioh bynta lem kiwei pat ki kontraktor bad khamtam ba kitei ki kam dei ban ai sha ki kontraktor kiba na ka dong Ri-Bhoi District bad kum ka kynhun kan sa leit ruh ban pynsngew hakhmat u myntri rangbah ïa kitei ki jingeh kiba ki kontraktor na Ri-Bhoi ki mad na ka por sha ka por.