Thmu ka MSSDS ban phah 100 ngut ki nurse ban leit trei ha ki jaka sumar ki ri ka pyrthei

Shillong, Naitung 22: Ha u bnai Lber 2023, ka Meghalaya State Skills Development Society (MSSDS) ka la sdang ïa ka kam kaba la khot ka “Mission Moon”. Kane ka jingsdang ka thmu ban phah 100 ngut ki kyrtong kiba dei hok na Meghalaya kiba don ha ka kam ka koit ka khiah sha ki ri ka pyrthei ha kaba kin trei kum ki nongsumar bad ki nurse.
Kane ka jingtyrwa ka la pynpaw ïa ka jingduna ha ka pyrthei ïa kiba trei nurse kaba ym duna ïa ka 13 million ngut ki nurse, kaba pyni ruh ïa ka jingïar bad ka jinglah jong kito kiba la pynkhreh ban shim ïa kane ka kabu.
Kane ka khyllipmat ka la buh dak ïa ka lynti kaba wanphai na ka bynta ka MSSDS. Haba kdew ba ka jingaikam shwa ïa kiba na shnong kadei ka kam kaba hakhmat, ki rynsan ai kam ha ka pyrthei ki la tyrwa ïa kine ki lad ïa ki riew shimet bad kumjuh ruh ïa kito kiba la pyntbit. Ka jingduna ki nongtrei ha kiba bun ki karkhana ha ka pyrthei ka la ai pat ka lad na ka bynta ki samla ka jylla Meghalaya kiba kloi ban leit trei sha kine ki jaka ai kam.
Kane ka jingsdang ka la ïoh ka lad ban phah ïa ki samla hadien ba u Myntri Rangbah dalade u la ai ka jingkyrshan kaba pura halor kane ka rukom pyrkhat kam. Haba sngewthuh ba kane kan dei ka lad ban pynkylla ïa ka jingim, u Myntri Rangbah u la nohsynniang kumba T. 50,000/- sha ki nurse kiba la shah jied ban ïarap ïa ki jinglut haba ïadei bad kane ka jingpynkhreh ban shah hikai.
Kane ka jingïarap pisa ka pyni ïa ka jingangnud ka sorkar ban pynthikna ba ki samla ka Meghalaya ki la long kiba la biang ban ïakhun bad ban kiew ha ki rynsan treikam ha ki jaka ba la khot da ki ri ka pyrthei.
Ka MSSDS ka khot ïa ka jingdonkam ka jingpynïasoh ïa ki sap lyngba ki jingshah hikai khnang ba kin lah ban leh bha ha ki jingim jong ki khamtam ban kyntiew ïa ka ïoh ka kot jong ki samla ka jylla.
Da kaba pynthymmai ïa ka jingmut jong kane ka jingtyrwa ka MSSDS ka la ïatreilang bad ka tnat Health and Family Welfare, ka sorkar jylla ban ngam kham jylliew halor ka “Mission Moon”. Na ka liang ka tnat Health & Family Welfare ka la pyntip ba ki la don palat 1000 ngut ki nurse kiba la pynrung kyrteng ïalade bad ka Nursing Council of Meghalaya kiba dang ap ban ïoh kam ha ki jaka sumar bapher bapher kiba don ha ka jylla. Dei halor kane ka nongrim ba ïoh jingtip, la pynlong ïa ki jingïasyllok bad ki jingïalang ban pynthikna ba ki sap ki phong ba ki nurse ka jylla ki don kin lah ban pyndonkam ha ki jaka sumar kiba don ha ki ri bapher bapher. Ka la long kaba shai ba da kaba pynkupbor ïa kine ki samla kiba la tbit kiba don ki sap kiba dei bad kumjuh ruh ki jingtip kiba biang, kan ïarap ban kyntiew ïa ka ïoh ka kot ka jylla bad kumjuh ruh ban kyntiew ïa ki kyrdan ka jinglah ban trei jong ki sha ki ri ka pyrthei.
Ki la don haduh 61 ngut ki nurse kiba la leit trei sha ri Japan bad Singapore bad kumba 30 ngut mynta ki dang leit shah hikai halor ki ktien ban kren ha shwa ba kin leit trei sha ri Germany.
Kine baroh ki jingpyrshang ki la wanjia lyngba ka Overseas Nursing Job Fair, kaba la long ha u bnai Nailar 2023. Kane ka ailad ruh ïa ki nurse kiba kwah ban trei sha ki ri ka pyrthei ba kin lah ban kynduh beit beit ïa ki shnat ai kam, ha kaba kane kan pynkutnoh ka jingthylli hapdeng ki local talent bad ka global demand.
Hadien ka Overseas Nursing Job Fair, 2023 kaba la plie lad ha ka ïohkam ïohjam shabar ri, ka Meghalaya State Skills Development Society (MSSDS) ka la ïohpdiang ïa shibun ki jingkylli ym tang na ki riewshemphang halor ka koit ka khiah hynrei na ki samla kiba dang sdang kiba kwah ban leit sha ki ri ka pyrthei na ka bynta ka ïohkam ïohjam ha ki karkhana bapher bapher.
Kine ki jingpyrshang ki long ruh ki jingailad ïa ki samla ba kin ïakhun ïa ki kam bapher bapher khamtam kiba don sha ki ri ka pyrthei kiba thmu ban ai jingshngaiñ halor ka jingai kam kaba ym duna ïa ki 500-1000 ngut ki samla ha kine ki 2 snem ban wan. Kine ki prokram ki kynthup ki jingai jinghikai halor ki ktien, ki kolshor bad ki jinghikai ba kyrpang ha ki sap bapher bapher haba ïadei bad ki ïew ai kam bapher bapher.