Shillong, Nailur: U kyrtong ka seng Congress ha Mawlai u bah Marbud Dkhar u la ther tyngeh bad pynrem jur ïa ka jingkren laplah jong u khliehduh ka Rashtriya Swayamsevak Sangh (RSS) u Dr Mohan Bhagwat, ha ka jingkren jong u ha U Soso Tham auditorium, State Central Library, Shillong.
“Na ka liang jong nga, nga pynrem jur ïa ka jingkren laplah u khliehduh ka RSS u Dr Mohan Bhagwat, ha ka jingkren jong u ha U SoSo Tham Audito-rium,” ong u bah Marbud Dkhar, uba long ruh u president barim ka FKJGP Mawlai.
U la bynrap, “Ha Ri India kaba wat ka riti synshar ka ithuh ïa ka jinglong bun jait-bynriew, ka jingngeit, kolshor bad ter ter bad ka buh bun ki aiñ ruh ban ïada ïa kine ki jinglong kyrpang, khamtam ki jaitbynriew ba pher ba pher kine ki thaiñ lam mih ngi jong ka ri India.”
U ong ruh;“Kane ka jingkren kaba baroh ngi sngewthuh ba ka dei ka agenda ba shyrkhei ka RSS ban leh donbor halor jong ngi ki rit paid, ka long kaei kaei ka bym lah ban pdiang bad kaba long beaiñ ruh.”
Nalor kata u la pynpaw ruh ba ka Ri Khasi ka dei ka Bri u Hyññiew trep Hyññiew skum, bad ki don la ki niam ki rukom kiba une u briew um tip bad um burom ha kajuh ka por.
Ha ka jaka ban kren ban ïada ïa ki Khristan kiba shah leh beiñ kylleng kylleng ka Ri India, ne ban kren halor ki jingeh ki rit paid, u kren pynban ban pynbuh jingma ïa ka identity ne jingithuh jong ngi ki Khasi.
“Nga lyngngoh ruh kumno ki nongïalam ka BJP kiba dei ruh ki Khasi kim shym la batai khyndiat khynsoit ruh ïa une u Bhagwat kumno ba un kren ha Ri khasi. Kine ki rukom pyrkhat kiba ngim lah ban pdiang ka lah ruh ban wanrah ki jingkulmar ba bun hadien habud. Kum ki khasi ngim lah ban pdiang ïa kum kine ki rukom pyrkhat ba dang dum kine ki kynhun shit niam,” pynkut u Bah Marbud Dkhar haba kren shaphang u heh ka RSS..
