Ther u Dr.Mukul ba kynthuplang hajuh ïa ka jingtohkit tih dewïong be-aiñ bad bthei bom

Shillong, Rymphang 16 : U Nongïalam ka Liang Pyrshah u Mukul Sangma ula kyrpad ïa ka ïing Bishar ba kan shimkhia halor ka jingbthei ka par dewiong dang shen ha Mynsngat-Thangsko bad pynthikna ba dei ban phiah ïa ka jingtohkit la ka jong kata ia ka jingtih dewiong beain ym dei ban kynthup lang bad kane ka jingtohkit halor ka jingbthei bad bishar la ka jong ka jong ha ïing Bishar khnang ba kan plie lynti ïa ka jingtohkit ba laitluid.
“Ka jingpynslem ïa ka jingbishar ka hok ka dei ka jingpynduh ïa ka hok, nga khmih lynti bad nga dang don ka jingkyrmen ha ka jingstad jong ka ïing Bishar ba kan shimkhia ïa kane bad shim ïa ka lynti ha ka ban shim rai ka ban don ka jingpynsangeh noh mardor. Kane ka dei kaba donkam bad ban shah ïa ka jingtohkit ba laitluid” ong u Mukul.
Ula ban jur ba halor ka jingtih dewiong beaiñ, ym dei ban kynthup bad ka jingbthei ka par dewiong namar dei ban phiah la ka jong bad ban bishar ruh la ka jong ha ïing Bishar “
U Mukul ula kynnoh ba ka Sorkar ka don ïa ka plan ba sha lyndet ban shah ïa ki kam beaiñ ba kin bteng, haba ai nuksa ïa ka interim report ba 35 jong ka Justice Katakey Committee, kaba pyni ïa ka jingjur ki kam tih dewiong beaiñ.
“Lada phi kwah ban pynkut ïa kane ka jingleh beaiñ, kane ka Sorkar kan hap ban kut noh . Katba phi dang shah ïa kane ka Sorkar, ki kam beaiñ kin dang bteng beit, kynmaw ïa kane ka kyntien jong nga” ong u Dr Mukul haba bynrap ba ka jingïai kyntait jong u Myntri Rangbah halor kane ka kam hapoh ka ïing Dorbar ka dei ka kam kaba sngewkhia bha.
U Dr Mukul ula pyntip ba un sa wanrah da ka resolution pyrshah ïa ki kam tih dewiong beaiñ wat hapdeng ka jingtip bha ba kane ka kam ka long subjudice, ba ka dang don hapdeng ka jingbishar hapoh ka ïing Bishar.
“Ngan sa wanrah ïa kane ka resolution ha ka ïing Dorbar watla nga tip bha ba ka rule kam shah ïa nga” ong u Mukul haba kdew ba kane ka kam ka long sub judice.