Shillong, Jylliew 23: Ka Seng BJP lyngba u nongaikten jong ka, u Bah Marïahom Kharkrang, ka la ther tyngeh ïa ka jingkynnoh bad kren pyrshah u President ka Meghalaya Pradesh Congress Committee (MPCC) u Bah Vincent H Pala.
Ha ka kyrwoh ba la pyllait mynta ka sngi, u Bah Kharkrang, u la ong ba ka Congress kadei kadei ka Party kaba la jur bha ka jingbamsap bad ha ka jingsynshar jong ka ruh la shu jyllei beit da ki kam bamsap.
Une u heh Pulit ba mynshuwa, u la ong ruh ba ka jingmutdur jong ka Congress ba ki Party kiba don ha ka sorkar MDA 2, ba la ïalam da ka NPP ba kin iehnoh noh ïa ka BJP bad kdup noh ïa ka Congress ha ka sorkar kadei ka jingpyrkhat ne ka jingphoh sniew kaban nym ïahap satia bad ka saiñhima na ka jylla Meghalaya. “Baroh ki paidbah ki tip ba ka BJP kadei ka paralok kaba khlaiñ ha ka sorkar MDA bad kaba peitngor ïa ki jingtreikam ka sorkar”, la ong u Bah Kharkrang.
U nongaiktien ka BJP Meghalaya, u la ong ruh ba kane ka jingkren u MP ka Shillong kadei tang ka buit ban pynthame ïa ki paidbah kiba la ieit bad shaniah ïa ka jingïalam u Myntri Rangbah Duh ka ri, u Narendra Modi.
Shuh ka BJP ka ong ruh ba ka Congress kan ïaleh katba don ka buit ban snoh kat haba lap, namar ba ka long kum ka jhad kaba la jan ngam artad.
