Ther u bah Ardent ïa ka jingthung ïa ki kam Chairman, ka dei tang ka jingpynlut phut pisa khlem jingmyntoi

Nongpoh, Jylliew 17: U MLA ka Nongkrem u Bah Ardent Basaïawmoit u ba dei ruh u President jong ka VPP, u la ther tyngeh ïa ka sorkar halor ka jingpynmih ïaki kam Chairman, Co-Chairman bad Vice-Chairman ha ka jingïalang paidbah ka ba la pynlong ha Umsning, kaba dei tang ka jingpynlut phut ïaka pisa sorkar bad ki bym don jingmyntoi eiei ïaka jylla.
U ne u nongïalam ka VPP u la ther pyrshah ïa kane ka jingleh jong ka sorkar naduh ka MDA 1 bad ka MDA 2 kaba la shu pynsyrwa kai ïaka pisa u paidbah da kaba ai doh kyndang da ki kam Chairman, Co-Chairman bad Vice-Chairman sha ki briew jong ki party kiba don ha ka sorkar synrop.
U la ïathuh ruh ïa kine ki briew kiba la shu thung daka sorkar ki ïoh ïaka kyrdan ban ioh jingmyntoi kum ka kyrdan u Myntri Rangbah bad ki Myntri Sorkar, ha kaba ka sorkar ka hap ban siew lut baroh ki jinglut jingsep naduh ki nongpahara, ka bai leit bai wan, ka bai ïing bad kumta ter ter ba kum ki Myntri sokar ki ioh haka jylla.
U la ong ruh halor katei ka bynta naka liang ka VVP kan sa pynlong da ka jingïakhih ban dawa naka sorkar ba dei ban weng noh ïa kine ki kam Chairman kiba la shut hung khlem kam tang ban shu pynhun ïaki bad kyrpad ruh ïaki paidbah ba kin ai ka jingsnohkti lang haba ka party ka khot ïa katei ka jingïakhih.