Shillong, Jylliew 30 : U National Vice President ka NPP, u Bah Prestone Tynsong ba dei ruh u Symbud Myntri Rangbah ka jylla ha ka sngi Palei u la ther kylla ïa u National General Secretary ka Trinamool Congress, u Abhishek Banerjee da kaba ong ba kitei ki dei tang ki jingkren khyllung khynnah bad u tyrwa ruh ban ai jinghikai ïa u kumno ban kren paidbah.
“U donkam ban shah hikai bha kumno ban jam shakhmat na ka bynta ban shakri ïa ki paidbah ka ri India. Na ka bynta kane ka jinghikai u donkam ban wan biang sha Shillong khnang ba ngi na ka NPP ngin lah ban ai jinghikai ïa u ba un sngewthuh kumno ban pyndonkam ïa ki kyntien kat shaba u leit kylleng ka ri India,” ong u Bah Prestone haba kren bad ki lad pathai khubor.
Katei ka jingkynthoh ka mih hadien shisngi ba u Abhishek Banerjee uba ha ka jingwan jong u sha nongbah Shillong u la kynthoh tyngeh ïa u Myntri Rangbah ka Jylla nalor ba u kynnoh ruh ba ka sorkar MDA ba ïalam da ka NPP kadei tang u tyngshop jong ka BJP.
Da kaba kam ba u National General Secretary ka AITC u dang lung bha ha ka saiñpyrthei, u Bah Prestone u la ong, “U dang lung bha ha kiba bun ki liang, kawei ka long ba u shu kynnoh khlem da don ki sakhi satar kaba nga shim ba kadei ka jingleh khyllung. Bad kum u nongïalam ba la paw jong ka TMC ha India phi don hangne hapoh 24 kynta phi leh pat kumba phi tip lut.”
Shuh shuh u ong ruh ba u kulmar namar ka sorkar MDA ba ïalam da ka NPP ki la sdang ban shakri ïa ki paidbah ka jylla naduh u 2018 tad haduh mynta, ki paidbah ki la ïohi kumno ka sorkar MDA hapoh ka jingïalam jong u Conrad Sangma, ki trei. “Dei na kata ka daw nga sa ong ruh ba katei ka jingkren u Abhishek kadei ka jingkren khyllung.”
U Bah Prestone u la khyrwit kylla ruh ïa ka jingkynthoh utei u heh AITC ba ka jingpynbeit pud ha ki hynriew tylli ki jaka hapdeng ka Meghalaya bad Assam kadei tang ka jingpyrshang ban pynsngewbha ïa ki heh ha Delhi.
“Um tip ei ei shaphang ka ishu pynbeit pud hapdeng ka Meghalaya bad Assam. U wan ïasoh sha ka sainpyrthei dang mynin katba kane ka jingeh pat ka la don mynta la 50 snem, kumta ngam kwah ban pynshai ei ei. Ngam kwah ruh ban pynlut kai ïa ka por jongnga namar ngi baroh la kha bad la heh la san ha Meghalaya, ngi sngewthuh bad ngi tip khambha ban ïano ïano ruh,” u la ong.
Ha kawei pat ka liang, u Bah Prestone u la khyrwit kylla da kaba ong ba ki 12 ngut ki MLA ka AITC kim shym la donlang ha ka jingwan jong u sha ka jylla. “Lada dei manga shwa ba ngan wan ngan pyntikna ba baroh 12 ngut ki long kawei bad kin donlang ruh ha ka jingïalang,” u la ong da kaba pynpaw artad ïa ka jinglyngoh kumno na ki 12ngut, tang 8 ngut kiba poi sha ka jingïalang.
