Shillong, Risaw 29: Ka Shnong Trongpleng ha ka jingïalam ka Kong Pelcy Snaitang, Manager jong ka Kur 7 Kynthei, ka la ther kylla halor ka jingkynnoh jong u Bah Donbok Kharlyngdoh, Myntri jong ka Hima Maharam bad kumjuh ruh ka Kurim jong u, ha kaba ïadei bad ka jingjia kaba la jia ha Shnong ha ka 26 tarik mynta u bnai ha kaba ka la don ka jingïashoh ïadat bad ka jingïaknieh tynghung.
Ka Kong Pelcy, ka la ong ba kane baroh kadei ka jingleh donbor jong u Bah Dokbok, uba la pynieng da ki siej ïa ka tynghung ha ka Shnong khlem da ïoh jingbit na ka liang jong ka Shnong, ban kam ba kane ka Shnong kadei kata ka Mawpait Trongpleng kaba hap ha ka Hima Maharam. Katba ha ka jingshisha ki kot ki sla bad wat ka District Council ruh ka ithuh kum ka Shnong Trongpleng kaba ha ha ka Hima Bhowal. “Wat ka Tribunal ba la thung da ka High Court ruh ka la ong ba ka Trongpleng ka hap ha ka Hima Bhowal”, la ong ka Kong Pelcy.
Ka la ïathuh ruh ba kane ka rai ban weng noh ïa ka tynghung kadei kaba la rai da ka dorbar namar ba ki la wan buh khlem jingbit jong ka Shnong.
Na ka liang kane ka longkmie ryngkat ka jingïadon lang u Rangbah Shnong, ki nongïalam Balang na Trongpleng, ki la pynrem jur ïa ka jingkynnoh u Bah Donbok ba ki nongïalam Balang ruh ki la ïadon kti lang ha kane ka kam. Katba ha ka jingshisha ka la kam ba ka jingïakynduh ki nongïalam Balang ha ïing jong ka (Kong Pelcy) kadei ban ïapynbeit na ka bynta ki kam jingïaseng bad kam don jingïadei eiei bad ka jingjia ha ka 26 tarik.
Shuh shuh ka la ong ruh ba ka District Council, khamtam u Bah PN Syiem, MDC um ïadon bynta ei ei bad kane ka kam, namar u Bah Pynshngaiñ um shym la treh ban tuklar ïa kame ka kam bad ieh ha ka jingïasngewthuh jingmut ki artylli ki Hima ban ïakren pynbeit. Hynrei tang hadien ba u Bah Pynshngaiñ um shym la long CEM shuh ba ka KHADC ka la ithuh ïa ka Trongpleng kum kawei na ki Shnong jong ka Hima Bhowal.
