Shillong, Jymmang 02: Ka Meghalaya Pradesh Youth Congress (MPYC) ka la ther tyngeh ïa u President ka All India Trinamool Congress (AITC) Meghalaya, u Bah Charles Pyngrope, MLA halor ka jingkynthoh jong u pyrshah ïa u President ka Meghalaya Pradesh Congress Committee (MPCC) u Bah Vincent H. Pala.
Ha ka kyrwoh ba la phah mynta ka sngi da u President ka MPYC, u Bah Adrian L. Chyne Mylliem, u la ong ba kumno kat ka rynïeng u Bah Charles Pyngrope uba la long ruh u Speaker barim ka jylla, um sngewthuh ïa ka kyntien shah sospon bad shah beh. U Bah Adrian, u la ong ba wat ka Seng kmie jong jong u Bah Charles ka Trinamool Congress ha West Bengal, la bunsien ka la pdiang biang ïa ki MLA kiba la shah sospon ha ka Seng. “Baroh kiba tip ïa ka saiñpyrthei ki sngewthuh ba ki dkhot kiba shah sospon ki lah ban wanphai biang sha ka Seng ha kano kano ka por hadien ka jingïasngewthuh jingmut”, la u nongïalam ka MPYC.
U la ong ruh ba ki san ngut ki MLA ba shah sospon jong ka Congress ki lah ban wanphai biang ha kano kano ka por sha ka Congress bad yn weng noh ïa ka jingshah sospon jong ki hadien ka jingïapynbeit bad sngewthuh jingmut kumba la ju leh ha ki por ba ladep.
“U Bah Charles u la klet imat ba wat ha ka por ba u dang long Speaker ruh, u Adolf Lu Hitler, MLA ka NCP, uba la shah sospon, hynrei ïa ka suspension jong u la weng noh tang hadien katto katne por ba u wan phai biang sha ka Party”, la ong ka MPYC, da kaba bynrap ruh ba imat u Bah Pyngrope u leh khnang ïa kane ban pynklumar jingmut ïa ki paidbah.
Shuh shuh ka Seng, ka ong ba ka Congress kam don eiei ban buhrieh ba borabor ka jingkhang ka plie ïa ki MLA bad ki dkhot kiba la mih noh na ka Seng, lada ki kloi ban bud bad kohnguh ïa ki jingtreikam jong ka Seng. “ Ym dei u Bah Pala uba klumar jingmut, hynrei dei pynban u Bah Pyngrope, namar ba u President ka MPCC, u ladep kren shai ïa ka jingtreikam jong ka Congress.
Ka MPYC, ka kren shai ruh ba ki paidbah mynta ki la kwah ban phai noh sha ka Congress namar ki la ngiah ïa ka jingtreikam kane ka sorkar ba mynta bad ruh kim kwah ruh ïa ki Seng kum ka AITC, kaba dei ka Party kaba im bad jop elekshon da ka lynti jong ka jingpynklumar ka lynti jong ka jingïaumsnam.
Ka Seng ka ong ruh ba u President ka MPCC, u ngeit ba ki MLA kiba ïaid ha ka lynti kaba dei bad kaba khuid kin wan phai biang sha ka Congress.
