Ther kylla ka BJP ïa ka Congress ba pynsngewthuh bakla hadien ka jingpynkylla kyrteng ïa ka MGNREGA

Nongpoh, K’lyngkot 10: Kumba la mih ha ki lad pathai khubor ba ka Congress party ha ka ri bad wat ha ka jylla ki la pyrshang ban pynsngewthuh bakla ïa ki paidbah, hadien ba la pynkylla kyteng ïa ka skhim MGNREGA, ki nongïalam ka BJP na Ri Bhoi ha ha ka jingïalam u President u Bah Sen Thaba ki la ther kylla ba ka party Congress ka shu wad daw bad pynsgewthuh bakla ïa ki paidbah halor ka jingpynkylla kyrteng ïa katei ka skhim MGNREGA.
Haba kren sha ki lad pathai khubor, u President ka BJP u Bah Sen Thabah bad u State President ka BJP ST Morcha u Himanta Timung, ki la pynshai sha ki paidhah ka Ri Bhoi bad ka jylla hi baroh kawei ba ka jingpynkylla kyrteng ïa katei ka skhim MGNREGA sha ka VB-GRAMG Act 2025 kam don jingktah satia ïa ki paidbah bad pynban ka dang ai jingmyntoi kham bun ïa ki paid nongshong shnong ka jylla bad ka ri.
Ki la ong ruh ba ka jingpynkylla kyrteng kam dei tang ha ka por ba synshar ka BJP bad ha ka por ba synshar ka Congress ruh ki don ki jingpynkylla kyrteng ïa kiba bun ki kam pynroi bad kane ka jingkynthoh ka Congress hadien ba la pynkyla kyrteng ka dei tang ka jingwad daw bad ban pynsngewthuh bakla ïa ki paidbah.
Ki la ong ruh hadien ba la pynkylla kyrteng la dang pynjanai bad dang pynbha shuh shuh ïa kane ka skhim bylla sngi ki nongshong shnong ka ri na ka jingai jingbylla kaba 100 sngi la kyntiew haduh 125 sngi bad nalor kata ruh ka jingmang pisa ka dei haduh 90% na ka sorkar kmie bad tang 10% na ka sorkar jylla.
Ki la bynrap ruh da kaba ong, ym tang ba la dang pynkiew ïa ka jingaikam ai jam ïa ki paid nongshong shnong ban wan bun ki kam pynroi sha ki shnong ki thaw bad ka sorkar BJP kan pynkloi ruh wat ban pynlait ïa ka pisa khnang ban myntoi ki paidbah ha ki kam pynroi bad ruh wat ha ka bai bylla jong ki.
Namarkata, ki la kynthoh jur ruh ba ka jingmih ka Congress ban pynngewthuh bakla ïa ki paidbah ka dei tang ka jingkhwan bor ne ba tieng ïoh ka party Congress kan duh bor noh, hynrei ha ka jingshisha ka jingpynkylla kyrteng kan nym don jingktah ïa ki paidbah ba kum paidbah nongshong shnong ka jylla kim dei ban sngewthuh bakla ne shah ïalam bakla ha ka party Congress, ki la bynrap.