Ther ka VPP ba sngap jar ka Sorkar ïa ka jingpynbna ka NEHU ban pyntreikam ïa ka NEP-2020

Shillong, Naitung 23 : Ka Voice of the People Party (VPP) mynta ka Sngi U Blei ka la ther tyngeh ïa ka sorkar jylla ba ka sngap jar halor ka rai jong u Vice Chancellor ka NEHU ban pyntreikam noh ïa ka National Education Policy (NEP) 2020.
Nalor kane ka dawa ruh na u Myntri Rangbah u Conrad K Sangma ban weng noh ïa u Myntri ka tnad pule puthi u Rakkam A Sangma namar um lah ban peit bad ïalam ïa ka tnad pule puthi.
“ Ka jingsngap jar jongka sorkar halor kane ka rai jong u VC ka NEHU ban pyntreikam ïa ka NEP 2020 ka la pynbitar ïa baroh. Kaei kaba pynlong ïa ka sorkar jylla ban sngap jar halor kane ka jingrai leh donbor u VC ka NEHU, kylli u Vice President ka VPP u Dr Kara H Shen .
U la pynpaw ba ki paid nongshong shnong ka jylla ki kwah ban ïoh ka jingpynshai na u Myntri Rangbah ne na u Myntri ka tnad pule puthi.
U Bah Shen u la kynnoh ruh ba kumba ka paw une u myntri ka tnad pule puthi imat um lah ban peit bad ïalam ïa k a tnad pule puthi bad dawa ba u myntri rangbah u la dei ban buh da kiba lah ban peit ïa kane ka tnad. “ Ka lawei jong ki khun ki kti jong ngi kam lah ban long ne ban pynkitkhlieh da u briew u bym lah ban pynïaid ïa ka tnad ne ban synshar ïa ka tnad pule puthi” ong u bah Shen.
Ha kaba pynpaw ka jingbym hun ïa kane ka sorkar MDA u la banjur ïa u myntri rangbah ban kham pynduna ka jingkren bad trei da ka kam.U la pynkynmaw ba ha u Nailur 2020 mar ïa pynbna ka kynhun myntri ba la mynjur ïa ka NEP 2020 u myntri rangbah u dei uba nyngkong eh ban pynbna ba ka sorkar kan pyntreikam ïa kane ka policy.
Khlem da pyrkhat jngai u myntri rangbah u khlem phah pynkhreh kumno ban pyntreikam ïa ka policy khamtam ha ki klass kiba kham shalor. Ka long ka jinglehraiñ ba haba ka NEHU ka pynbna ba baroh ki jingpynrung Class sha ki Undergraduate jong ki College ha Meghalaya ki hap ban ïaleh ïa ka eksamin CUET ba la pynïaid da ka National Testing Agency ha kaba ka sorkar jylla ka hap ban leit nguh leit dem ïa ka sorkar pdeng ban pyllait ïa ka jylla Meghalayaq na kane ka test. Shuh shuh ki samla pule ha ka jylla ki duh noh ïa ka jingthrang jongki ban ïai bteng ïa ki jingpule ha ki Post Graduation tang namar bym don ki testing centre ha ka jylla.
U la pynkynmaw ba dang ha ka 1 tarik u Jylliew 2023 u myntri ka tnad pule puthi u Rakkam u la pynbna ba ka jylla kam pat lah ban pyntreikam ïa ka NEP 2020 ha ki college na ka bynta u snem 2023-24.
U la kylli, kaei ka daw bah ba la pynlong ïa ka jylla ban rai pyntreikam noh ïa ka NEP tang hapoh arbnai hadien ba la dep kren u myntri ba ym pat lah ban pyntreikam. Kiei ki lad ki lynti ba ka sorkar ka la shim ban pynlong ïa ki College ban pynkhreh ban pyntreikam ïa ka policy. Hato u Myntri ka tnad pule puthi u duna bad tlot haduh katne ba u VC ka NEHU un ïoh leh donbor halor ka rai jong ka sorkar jylla kumba la kren da u myntri ka tnad pule puthi.
U la kylli shuh shuh Hato ka sorkar jylla ka tieng thot thot haduh katne ban pynsngewsih ïa u VC ka NEHU bad ïa kita ki heh saiñ pyrthei na Delhi? Kiei ki jingpynkhreh ka sorkar ban pynbit pynbiang khamtam halor ka jingkiewdor nadong shadong da ka jingpyntreikam ïa ka NEP. Hatp ka sorkar jylla ka la tip ba lada pyntreikam ïa ka NEP khlem da pynkhreh janai kan pynpep skul ïa kiba bun ki samla pule nalor ba ka jylla Meghalaya ka long kaba duk tasam.
Ka VPP ka dawa ba ka NEHU ka dei ban ïamir jingmut bha bad baroh kiba ïadon bynta shwa ba kan shim ïa ka rai ban pyntreikam ïa ka NEP. Namar ym lah ban pdiang da lei lei ruh ban shu pyntreikam jubor bad leh donbor ïa kane ka policy.