Nongstoiñ, Nailur 15: Ka Seng UHM West Khasi Hills bad Eastern West Khasi Hills ha ka jingïalam u Samla Moonstar Nongrem President bad Samla Bishar Rekon Thabah General Secretary, hadien ka jingïoh jingujor na ki paidbah ka shnong Rngisawlia, Dombah, Dommawlieh kaba hap hapoh Mawthadraishan Block bad Constituency halor ka jingsniew palat ka surok na Pariong sha Rngisawlia bad Pariong sha Kynshi, kumta ka seng ka la hiar hi ban leit jurip da la ki jong ki khmat bad lap ruh baka jingsniew ka surok ha kitei ki shnong, ka lah long shaba palat pud, ha kaba ki maw kiba heh ki lah paw bad don ruh ki jaka ba lah kylla kum ki pung Dohkha.
Kane ka jingsniew ka surok ka wanrah shibun ka jingeh ïa ki nongshong shnong, khamtam lei lei ha ka shitom ka pang ha kaba ban ïaid tang da ki minit, hynrei ki hap ban ïaid da ki kynta namar ka jingsniew ka surok kaba lah palat. Ka seng haba kylli na ki katto katne ki riew rangbah jong ki shnong, ka lap ba kane ka jingsniew ka surok ka la don mynta lah jan 10 snem ei ei.
Ka seng ka buh ka jingkylli ïa u Nongmihkhmat katei ka thaiñ bad ka Tnad PWD, balei mynta la bun snem kim ïohi ïa katei ka surok bad ban ieh khunswet ïa kitei ki shnong. Ka seng ha ka jingleit jurip ka la lap ruh ba don ki jaka siang rong kiba don tang na sdang bad haba kut bad hapdeng ka long tang ka surok khyndew, te shaei ka jah ka rong kaba dei ban siang ha kitei hi jaka.
Kaba sngew phylla ïa ka Ssurok na Pariong sha Rngisawlia ka la don ka jingsiang rong tang na sdang ba mih na Pariong. Hynrei ym lah ban pynpoi shaduh Shnong Rngisawlia, te ka balei ym lah ban siang pyndep kumba la sdang bad kumba la siang ha kiwei ki jaka. Ka Seng ka buh ka jingkylli ïa u MLA katei ka thaiñ u ba dei ruh u Minister ha ka Sorkar, ba shaei kata ka roi ka par ha kitei ki shnong kiba hap ha ka Constituency jong u hi, kumba u kular ha ki por ba Canvas Election ban wanrah kata ka roi ka par ha ka thaiñ, hynrei tang ka surok ban siang rong um lah ban wanrah.
Ka surok ka dei u budlum ka roi ka par bad lyngba ka surok yn lah ban weng ïa ka khia ka shon ki paidbah, khamtam ha ka shitom ha ka pang. Ka seng ka kyntu jur ruh ïa ka tnad PWD bad ïa u MLA ka thaiñ ban phai khmat sha kitei ki shnong ban leh ïa kaba donkam ban leh. Ka seng kan ym sngap lada kiba dei peit kin shu sngap mynthi, hynrei kan nang ïai dawa na ka por sha ka por naka bynta ka bha ka miat ki shnong ki thaw bad ban wanrah ki jingkylla, ong ka kyrwoh ba la phah da u Samla Bishar Rekon Thabah General Secretary ka seng.
