Ther ka TMC ïa ka Sorkar MDA ba pynslem ban pyntreikam ïa ka MRSSA 2016 ban talasi ïa ki mynder

Shillong, Naitung 16 : Ka All India Trinamool Congress (AITC) ne ka TMC ka la ther tyngeh ïa ka sorkar MDA ba la ïalam da ka NPP na ka bynta ka jingpynslem ban pyntreikam ïa ka aiñ Meghalaya Residents Safety and Security Act (MRSSA) 2016 na ka bynta ban talasi bad ïada ïa ka jingwantuid ki mynder bad bar jylla shapoh ka jyllla Meghalaya.
Ha ka jingpyllait khubor da u President ka State Youth Wing ka TMC u Richard Marak ul a ong “ Kum u trai shnong ba don ka jingsngewkhia jongka jylla Meghalaya, ngam banse ban kynthoh halor kiei kiba la jia bad ki jingbym shim khia ka sorkar ban peit ïa kine ki jingeh kiba don hakhmat jongka jylla. Kane ka jingbym shim khia bad jingleh lyngngai jongka sorkar ka la pynlong ïa ki paid bah ban duh ka jingshaniah ha kane ka sorkar”.
U la ong ba ka jingrai jongka Khasi Student Union (KSU) ban pynïeng da ka khyrdop Inner Line Permit (ILP) ban talasi mynder ka dei ka jingleh da ka jingbym banse ban pyntreikam ïa kiei kiba ka sorkar kam shym leh ei ei. Ka jingïoh bat ïa palat 500 ngut ki nongbylla bar jylla khlem ki kot ki sla kiba biang bad phah leit phai noh ïaki sha Assam ka kdew shai ba ka dei ka jingbym larkam ne jingbym
treikam jongka sorkar ban shim khia halor kane ka kam.
“ Ka jingkren jong u Myntri Rangbah ka jylla ba tang ka tnad Labour kaba lah ban bishar ïa ki kot ki sla ka pynpaw shai kdar ïa ka jingshah pynkyndit bynriew jongu haba la paw ki jinshisha baroh. Lada ka tnad Labour ka treikam hok balei ba dang don beit kita ki jingwan tuid ki mynder bad ki nongbylla sha ka jylla khlem ki kot ki sla” kylli u Marak.
Nalor kane u Marak u la ong ka jingkam jong u Myntri Rangbah u Conrad K Sangma ba ym don work permit ha ka jylla lait noh tang ban register ïa ki kyrteng ka pynpaw shuh shuh ïa ki jingbym larkam jong kane ka sorkar ban pyntreikam ïa ki aiñ kiba la don lypa.
Katei ka jingkren jongu ka kdew shai ïa ka jingdonkam ban pyntreikam kyrkieh ïa ka aiñ MRSSA 2016 kumba ka long naduh ba sdang khnang ban pynkup bor shuh shuh ïa ki bor synshar shnong ba kin ïadon bynta lang ha kaba shim ïa ka jingkitkhlieh ban peitngor ïa ka jingwan rung ki briew kiba nabar jylla shapoh ki shnong ki thaw khlem ki kot ki sla kiba biang ong u Marak.
Une u nongïalam ka TMC u la ong ba kat kum ka MRSSA 2016 ki nongbylla bar jylla kiba wan na shabar ka jylla ban trei hapoh kane ka jylla ki hap ban register bad ka District Task Force ne ha ki Felicitation Centre kiba la buh kat kum ka aiñ. Ka jinghap ban register ka long ban pynthikna nangno ki wan, kaei ka address jongki bad kiwei kiwei ki jingtih bniah. Hadien ba la dep register ki nongbylla sngi kin sa ïoh ïaka permit ne ka registration certificate ba kin trei hapohka jylla . Ki Kontraktor ne ki nongaikam kiba khot nongbylla na shabar ka Meghalaya ki hap ban pynthikna ban rejister ïa ki nongbylla ba ki wanrah . Ka jingthmu jongkane ka aiñ ka long ban buh ïa ki nongbylla bad ïa ki trai jylla ha ka jingshngaiñ.
“ Hynrei kane ka sorkar haduh mynta kam pat thaw ïa ki District Task Force ne ki Facilitation Centre kaba la buh ïa u dak jingkylli uba khraw kaei ka jingthmu jongka sha lyndet. Balei ba ka sorkar kam lah ban leh ïa kine ki jingdonkam, kaei ka jingthmu ha lyndet kane ka jingpynslem? Kane ka jingbym shim khia ka kdew shai kdar ba u Conrad bad ka sorkar MDA jongu kim long kiba tbit ban ïalam ïa ka sorkar ne kim kwah ban shim khia ïa kane ka kam” ong u Marak.
Halor kine ki jingjia na ka liang u Marak u pynrem jur ïa kane ka sorkar ba ka khlem shim khia ban pyntreikam ïa ka MRSSA hapoh ka jylla.
ïa kane ka aiñ la wanrah ha u snem 2016 hapoh ka jingïalam jongu Dr Mukul Sangma kum u Myntri Rangbah ka jylla hadien ba la pynwan dur bha ïa ka na ka bynta ban ïada ïa ki trai ri trai muluk jongka jylla. Hynrei kane ka sorkar kaba la wanrah ki jingpynkylla ïa kane ka aiñ ki la shah kyntait pynban ha ka sorkar pdeng kaba la shu pynlong bijai ei ïa ka kam. Ka jingthmu ban kongsan kane ka aiñ ka long ban peitngor ïa ka jingwan tuid ki mynder ri bad ki bar jylla sha Meghalaya da kaba ki hap ban register haba rung sha ka jylla. Ka thong ka long beit ban ïada ïa ki trai ri trai muluk bad kumjuh ruh ïa ka khaïi pateng.
Ka jingpynkup bor ïa ki bor synshar shnong ka long ba kin don ka jingkitkhlieh ban peitngor ïa kiba wan sah shapoh ki shnong ki thaw.Kane ka dei tang ka aiñ hapoh ka jylla kaba ai bor ïa ki Syiem, Sordar, ki Nokmas, ki Daloi bad ki Rangbah Shnong. Hynrei ka jingwanrah ïa ka jingpynkylla ïa kane ka aiñ ka la pynkylla khongpong pynban ïa baroh ki jingthmu. Ka jingrai u Lat ban phah ïa kane ka aiñ sha ka sorkar pdeng ban ïoh ka jingmynjur na u President ka pynpaw ba kane ka sorkar kam don ka jingïohi jngai bad kam don ka plan kaba biang. Kane ka jingleh ka la ktah jur ïa kane ka aiñ.
U Marak ul a buh ka jingkylli hato balei donkam ban wanrah ki jingpynkylla ïa ka aiñ MRSSA 2016 kaba dang shu sdang ban treikam ha ka jylla. Lada donkam ïa kata ka jingpynkylla ka sorkar ka la dei ban ailad ban ïatai sani bha hapoh ka ïing dorbar namar ïa ki MLA la jied ban thaw aiñ hynrei namar ba ka sorkar ka leh hi ka wanrah ka jinglehraiñ kylla ïa ki hi. Nalor kane u buh ka jingkylli kaei ka jingthmu jongkane ka sorkar ban pynjyrwit jyrwat ha ka jingpyntreikam ïa ka aiñ MRSSA kaba la dep ban thaw aiñ janai bha. Kumta khatduh eh u dawa ba ka sorkar ka dei da ka jingkhuid jingsuba ban pyntreikam noh ïa ka MRSSA 2016 kumba la thaw ïa ka naduh ba sdang khlem da wanrah kino kino ki jngpynkylla na ka bynta ka bha ka miat bad jingshngaiñ ym tang jong ki trai ri trai muluk hynrei wat ïa kiba wan bylla shapoh ka jylla ruh.