Ther ka RBYDSO pyrshah ïa ki jingkren ka MDC Umsning ha ka Tamasa ki samla Karbi, pynshai ki nongïalam ka AMKA

Nongpoh, Risaw 07: Ka Ri Bhoi Youth Developmental and Social Organization (RBYDSO) mynta ka sngi ka la ther tyngeh syndon pyrshah ïa ka MDC ka Umsning, ka Kong Macdalyne S. Mawlong halor ki jingkren jongka ha kawei na ka Tamasa ki Samla Karbi kaba la long ha Purdua, Ri Bhoi bad kum ka seng ka la pynpaw ka jingsngewkhia kaba jur da kaba kynnoh ba katei ka jingkren ka MDC Umsning ka la ktah mationg ïa ki paidbah ka Ri Bhoi bad wat ha ka jylla hi baroh kawei.
Na ka liang u President ka RBYDSO, u Bah Arnold Syngkli lem bad ki nongïalam ka All Meghalaya Karbi Association (AMKA) mynta ka sngi ki la wan ban pynshai paidbah halor ka jingkren katei ka MDC bad kim kwah satia ban don ka jingpharia jaid byrniew ha kaba ki Karbi bad ki Khasi khamtam ha Ri Bhoi ki don ka jingïadei kaba jan bad kam ju don kano kano ka huri hura ha kaba ki don hapdeng ka shongsuk shongsain naduh ki spah nem ba mynshuwa.
U Bah Arnold Syngkli, President ka RBYDSO, u la ong ba ka jingkren ka MDC ka Umsning, kaba ong, “ Wat ïanga ka Nongmihkhmat Khasi ba wan na Shillong ki dang kheiñ Nongwei, katno lei ïa phi Karbi” kane ka la ktah mationg bad kum ka seng kam lah ban sngewthuh kaei ka jingmut jong katei ka Nongmihkhmat paidbah ba kan kren kumtei khamtam katei ka tamasa ki Samla Karabi la dei ban kren na ka bynta ka jingïatylli bad ka jingïaieid, hynrei ban kren da kitei ki kyntien ka long kumba kwah pharia jaid bynriew ban don ka jingïashrut hapdeng ki Karbi bad ki Khasi khamtam ki jaid bynriew Bhoi ha Ri Bhoi District.
U la ong ruh ha ka jingshisha kum ka nongmihkhmat paidbah ka la dei ban kren na ka bynta ban don ka shongsuk shongsain bad ka jingïatylli hapdeng ki Karbi bad ki Khasi, hynrei ka pynmih pynban ïa kitei ki kyntien kiba la ktah mationg shisha ïa ki jaid bynriew Bhoi ba da ki spah snem bad haduh mynta kim pat ju don kano kano ka jingïapher hapeng ki Karbi bad ki Khasi.
“Ki Karbi bad ki Khasi khamtam ha Ri Bhoi naduh hyndai hynthai ki don ka jingïadei kaba jan la ka long ha ka imlang ka sahlang, ka shongkha shongman, ka jingïadei kur ka jingïadei jaid bad lada kren pat da kitei ki kyntien ka paw shai kumba kan sa ïalam bakla hapdeng ki Khasi bad ki Karbi ha kaba mynta lei lei ka don hapdeng ka jingïapynbeit pud hapdeng ka Meghalaya bad Assam ha Block II ba kum ka seng kam kwah shisha ban don kano kano ka jingïapher bad ngi dei ban bteng ban don kata ka jingïadei kaba jan khnang ba kna nym ktah ïa ka shongsuk shongsain la ka dei ha ki Karbi ne ki Khasi hapoh ka jylla Meghalaya” ong u Bah Arnold Syngkli.
Namrkara, shuwa ban kren ne pynpaw sha ki paidbah dei ban da pyrkhat sani bad ym dei ban shu kren laplah tang ban ioh ban kren, namar busien lyngba ka jingkren bakla ka wan pat ïa ka jingïapher jaid byrniew kaba ktah pat ïa ka shongsuk shongsain bad kum ki nongïalam ngi hap ban da tyngkan ïa ki ktien ki tylliej bad kaei kaba donkam tam ka long ban wan rah ïa ka jingïatylli, ka jingïaieid bad ka jingïadei kaba jan ban wan kata ka shongsuk shongsain kumba ki Karbi bad ki paidbah ha Ri Bhoi ki don ka jingïadei kaba jan naduh hyndai hynthai, u la bynrap.
Na ka liang u Bah Bistocan Timung, Secretary ka All Meghalaya Karbi Association (AMKA) bad kumjuh ruh u Samla Superlin Ronghang, Secretary ka Karbi Cultural Society, Meghalaya Zone, ki la pynpaw ba kim don kano kano ka jingsngewpher halor ka jingkren ka MDC Umsning bad kim tip hi ruh shano ka thew, hynrei ka jingkhot jongki ïa ki nongmihkhmat bad ki nongïalam seng ban don lang ha katei ka Tamasa ki Samla Karbi ka long ban don ka jingïadei bad ban don ka jingïatylli kum kita ki nongshong shnong hapoh ka jylla Meghalaya la ki dei ki Karbi ne ki Khasi.
Kitei ki nongïalam ka AMKA bad Karbi Cultural Society ki la pynshai ruh ba kim don kano kano ka jingsngew long nongwei ha ka jylla Meghalaya khamtam ha Ri Bhoi, namar naduh ka Hima Shyllong shuwa ban wan synshar ki British ki la don ka jingïadei kaba jan bad ki Khasi, ki ïaieit bad ki ïa trei lang bad ruh kam ju don kano kano ka jingïasngewpher ha kaba ki im suk ki im sam bad ki ïa kit ïa bah lang ïa ki kam ïap kam im jong ka imlang ka sahlang hapoh ka jylla.