Nongstoiñ, Naitung, 30: Ki samla na ka seng National Peoples Party lyngba ka tnad ki samla hapoh ka shatri National People Youth Front shnat Mawshynrut, hapoh ka jingïalam jong u samla Bendrowell Hashah General Secretary NPYF WKHD bad u Ïoanis Diengngan, ki la ther tyngeh ïa u bah Witting Mawsor MLA barim ka Mawchynrut konstitwensi, da kaba kynnoh ba u kren lap lah da kaba ong ba ka jingkam jong u ba ïa ka Civil Sub Division Mawshynrut Block, u dei ma u u ba la wanrah bad ka dei kawei na ki matti ne ki kam kaba u la pynurlong ïa ka jingangnud jong ki paidbah jong ka thaiñ.
Haba ïadei bad katei ka phang, na ka liang jong kitei ki samla ki la ong kumno u nud ban kam kynti haba wat ïa ka kyrteng jong u, ym shym la thoh ha u mawnongrim mynba u Dr Mukul Sangma u wan ban plie ïa katei ka Sub Division. Ki la ong ba dei tad hadien ba kitei hi ki samla bad ki katto katne ngut ki la leit ban kynroi ïa u Arun Kumar Kembhavi DC ba rim ka WKHD bad la pynbor ban thoh. Kumta na ka liang jong u DC u sa phah thoh da kawei pat bad la paw ka kyrteng u Witting Mawsor ha u Mawnongrim kum u MLA ha kato ka por, kam ki nongïalam ka NPYF.
