Pynursla, Jymmang 06: Ka Seng HYC Riwar Mihngi Circle ka la pynlong ïa ka jingïalang dang shen ha Pynursla ha kaba ka la thet tyngeh ïa ki rukom treikam jong ka sorkar MDA.
U Bah Roy Kupar Synrem, General Secretary ka Seng, uba la hiar khnang ban pynskhem bad pynsmai ruh ia ki nongkitkam ba la jied thymmai jong ka Circle, u la ther ryngeh ïa ka sorkar MDA da kaba ong ba kane ka sorkar ka la treikam khlem pyrkhat shuh ïa ki paidbah, khamtam eh ha kaba ïadei bad ka jingpynbiet pud bad ka Assam. “Ngi la kyrshan ia ki Policy jong kane ka sorkar hadien ba la sdang ban synshar ha u 2018, hynrei mynta kiba bun ki jingtreikam ki long pyrshah ïa u paidbah”, u la ong, ha kaba ïadei bad ka jingpynbiet bad ai bun ka jaka sha ka Assam.
U Bah Roy, u la beiñ ruh ïa ka sorkar halor ka jingtreikam ha kaba ïadei bad ka Them ïew Mawlong bad ka jingpynlong jaka khalai ïa ka jylla.
