Ther ka HNLC bym lah ka sorkar pdeng ban pynbeit ïa u pud ki jylla NE

Shillong, Naiwieng 22 : Ha kaba pynrem jur ïa ka jingshah siat iap ki san ngut ki mynsiem briew ha ki pulit Assam ha Mukroh, West Jaintia Hills ka seng HNLC ka la ther tyngeh ïaka sorkar pdeng namar kam lah ban pynbeit ïa u pud u sam ki jylla kane ka thaiñ shatei lam mihngi ka ri India haduh mynta mynne.
“ Ka Meghalaya ka la ïoh ïaka jylla ba pura khlem u pud u sam uba biang bad kane ka jingpynslem jongka sorkar pdeng ban pynbeit ïa u pud u sam ka la wanrah ïa kane ka jingïaumsnam ym tang ha kane ka jylla Meghalaya hynrei ha kiwei kiwei ki jylla jong kane ka thaiñ ruh kumjuh. Kane ka dei ka buit saiñ pyrthei jongka sorkar pdeng ban pyntlot bad pynïapait ïapra ïa ki jylla kane ka thaiñ” ong u General Secretary ka HNLC u bah Sainkupar Nongtraw ha ka kyrwoh ba la pyllait paidbah mynta ka sngi.
La ong ba kane kam dei ka sien ba nyngkong ba ki paid khappud ki la shah siat iap ha ki pulit Assam hynrei ka la jia na ka por shaka por bad ka daw baroh ka dei namar ba ka sorkar jylla ruh ka tlot bor palat.
“ Kumta ha kito ki bynta kiba ka sorkar pdeng kam lah ban sh im khia ban pyllait ïa ki jingeh ba ki paidbah ki ïakynduh, ka sorkar jylla ka la dei ban sngewthuh bad leh ïa ka kamram da kaba buh bun ki bor pulit kumba leh sha kiwei kiwei ki ri ban pynthikna ba kan don ka jingshong suk shongsaiñ ha kito ki jaka ym ban kylla kum ki nongphetwir ha la ka jong ka ri” ong biang ka kyrwoh.
Ka seng HNLC ka pynpaw ba ka jingkren ïasuk bad ka sorkar khlem pep kan ïarap ia ki paid ka Bri U Hynniewtrep ban pyllait na kane ka jingeh kaba ki ïa kynduh. “ Lada jia ba ka jingkren ïasuk kam long kaba seisoh, ka jingïaleh jongka seng kan ïai bteng wat lada kan shim por sa 35 snem ruh. Lada ban ïasuk ngi hap ban shu sngap jar ha kum kane ka saw ka sian ka jaidbynirew ïa kata hi ngim kwah bad ngim lah dalei lei ruh” pynkut ka kyrwoh na ka seng.