Mawkyrwat, Rymphang, 02: U Bah Poland Sohphoh u kyrtong jong ka Hill’s State People’s Democratic Party (HSPDP) bad u bah Carness Sohshang u kyrtong jong ka National People’s Party (NPP) na ka Mawkyrwat District Council Constituency ha ka sngi saitjaiñ jong ka taïew baladep ki la thep kyrteng ban ïakhun ha ka MDC Election 2025 ka ban long ha ka 21 tarik, Rymphang, 2025.
Haba kren ha ki lad pathai khubor, u kyrtong ka HSPDP u la ong ba lada un jop ha kane ka jingïakhun ïa ka MDC un buddien ïa shibun bah ki kam kata ka long ha kaba ïadei bad ki kam hapoh ka ïew duh ban ai ki jingbit ne ai trading license ïa ki nongshong dukan namar la ïohi ba u khasi jong ngi u shong ha phyllaw katba u briew ba nabar ka jylla pat u shong hapoh ïing ne poh dukan bad kumjuh ruh kawei pat ka long ban tih bniah halor ka jingshahktah kti ki Enforcement ha ki snem kiba ladep namarba kane ka kam ka la sahteng.
Haba kren halor ka jingkhlaiñ jong ka Party, u Bah Poland u la ong ba ha ka jingïaid lynti jong u hapoh ka Konstitwensi na ka liang ki paidbah shisha ki la ai ïa kata ka jingkyrshan bad ma u ruh u don ka jingkyrmen ban jop ha kane ka jingïakhun.
Ïa u kyrtong ka HSPDP la synran da ki bahaing hasem ryngkat ki nongkyrshan bad ki nongtrei party ba kynthup ïa u Bah Nolip Lyngdoh kum u President ka HSPDP.
Katba u Ba Carness Sohshang u la kren shai ba um babe ba u mih noh na ka Congress namar haba u mih ruh ka long da ka jingïatylli mlon bad tang katto katne ki sah ha ka Congress. Kumta hapoh ka jingïalam jong u Bah H.S. Diengdoh uba dei u kyrtong barim naduh u snem 2023 ka NPP hapoh Mawkyrwat la sakhi ba ka party ka dang don hapoh na jingïatylli bad ki dang trei smat ban pyntyllun ïa ki kam jong ka party bad don ruh ka jingkyrmen ban jop.
U la ong ruh ba lada un jop ha kane ka jingïakhun yn sa nang trei kham bha shuh shuh ban wanrah ki kam pynroi bad ban pynbha ruh ïa ki jingtreikam hapoh ka District Council. Ïa u Bah Carness Sohshang la synrang lang da u Bah H.S. Diengdoh, u bah Phrang Nongsiej, President ka NPP Mawkyrwat Block, kiba ha ïing lem bad ki nongkyrshan ka party.
