Nongstoiñ, Rymphang 02: Ka jingleit thep kyrteng jong ki kyrtong ki ban sa ïa aireng ha kane ka Election MDC ka ban sa long ha ka 21 tarik mynta u bnai, ka la jan poi sha ka jingkut hynrei ha ka sngi saitjaiñ ka 1 tarik Kyllalyngkot, lai ngut ki kyrtong jong ka Bharatya Janata Party West Khasi Hills district ki la leit ban thep kyrteng hakhmat ki Returning Officer ha Nongstoiñ.
Kitei ki kyrtong kiba la pyndep ïa ka jingleit thep kyrteng ki long u bah Roland Mawsor na ka Mawshynrut Constituency u ba la ïakhun teng ïa ka Election MDC ha u snem 2022, u bah Dibarland Lyngdoh na ka Nongstoiñ constituency bad u bah Dominik Wahlang na ka Rambrai Jyrngam constituency.
Ha ka jingleit thep kyrteng jong kitei ki lai ngut ki kyrtong la synran lang da u bah Spastarlin Nongrem Secretary ka BJP West Khasi Hills District ki nongkyrshan jong ki ryngkat kiba ha ïing ha sem.
U bah Roland Mawsor haba ïakren bad u nongthoh khubor hadien ba u la pyndep ïa ka jingthep kyrteng, u la ong ba ka jingmih jong u ban ïaleh ïa kane ka MDC election, ka dei namar ba u ïohi ïa ka jingeh bad ka jingshah khñiot jong ki trai muluk trai jaka ha baroh ki liang, khamtam eh hadien ba ka District Council ka la aiti ïa ki kot ki sla sha ka Forest ba kan tuklar ïa ki kam jong ka hok longtrai halor ka khyndew ka shyiap da kaba ka la khang ban tih maw tih shyiap, tih dewïong bad kiwei kiwei. U la ong ruh ba ka jingduh noh jong ki trai khyndew ïa ka hok longtrai jong ki, ka pyni shai ba ngi la duh noh wat ïa ka riti ka dustur jong ka jaitbynriew.
U bah Dibarland Lyngdoh pat u la ong ba ka jingmih jong u ban ïa aireng kum u kyrtong ha kane ka election MDC, ka dei halor ka nongrim ba u ïohi ïa ka jingeh jong ki paitbah naduh ki samla wad kam haduh ki nongbylla. U la ong ruh ba ka jingeh kaba ki nongbylla ki mad ha kine ki sngi, ka dei ka jingshah khñiot ha ka bai sngi kumta na ka bynta ba ki nongbylla kin ïoh ïa ka nongsngi kaba biang u hap ban mih ban ïaleh ïa kane ka election bad lada ki paitbah ki ai ka jingkyrshan bad pynjop ïa u un ai ka jingshakri kaba hok na ka bynta jong ki.
U bah Dominik Wahlang pat u la ong ba kum uwei na ki nongshong shnong ha khappud, u sngewthuh ba dei hadien ba ka BJP ka la ïoh ban bat ïa ka sorkar ha Assam, ka la shimkhia ban halor ka jingpynbeit pud. Kumta ka lada ki paitbah kin ai ka jingkyrshan ba pura bad kin pynjop ïa u kum u MDC, ka mat kaba nyngkong kaba u buh ka long halor ka kam pynbeit pud.
