Nongpoh, K’Lyngkot 29: Ki 5 ngut ki kyrtong ka VPP party na Ri Bhoi District mynta ka sngi ki la pyndep ban thep kyrteng ha ka ophis u Deputy Commissioner na ka bynta ban ïa khun ha kane ka election MDC sha ka ing dorbar thaw aiñ ha Khasi Hills Autonomous District Council, kaban sa long ha ka 21 tarik u Rymphang 2025.
Kine ki kyrtong ka VPP party kiba la pyndep ban thep kyrteng ki kynthup ïa u Bah Bah Mathew Makdoh na kyrtong ka VPP na Nongpoh, Isynei Hinge na Umroi, Apkyrmen Lyngdoh Nonglait na Jirang, Banrikus Nongsteng na Umsning, bad u Bah Kynjohlang Rangtong na Mawhati.
Ha kane ka jingleit thep kyrteng, la synrang lang ruh da ki nongïalam bad ki nongkyrshan ka VPP Party na kitei ki san tylli ki Constituency bad kitei ki kyrtong ki la pyndep ban thep kyrteng ha khmat ki Returning Officer ba la buh na ka bynta ban peit ban khmih ha kane ka election MDC sha KHADC.
Haba kren sha ki nongthoh khubor, hadien ka jingpyndep ban thep kyrteng kum ki kyrtong ka VPP ban ïa khun ha kane ka election MDC, u Bah Mathew Makdoh, kyrtong ka VPP na Nongpoh bad u Bah Isynei Hinge kyrtong ka VPP na Umroi, ki la ong ba ka thong kaba hakhmat eh kaba ki mih ban ïa khun ha kane ka election MDC sha ka ïing Dorbar thaw aiñ ha KHADC, ka long ban wan rah ïa ka jingsynshar kaba khuid bad ruh ban pynduh ïa ki kam bamsap khnang ban kiew ka jaid bynriew bad ka jylla.
