Nongpoh, Risaw, 25: Ka lympung ïakop pynher kali ha ki surok ktieh bad ki khohruh khohram bala tip kum ka 7th AHOR 4X4 Off Road Challenge 2025 bala pynlong da ka Adventurous Hynñiewtrep Off Roaders (AHOR) ka la poi noh sha kaba kut mynta ka sngi harud ka Pung Umïam ha ka shnong Mawlyndep, ha Ri Bhoi hadien ba ki nongñiah kali na kylleng ka Ri Khasi bad Jaiñtia bad nabar jylla, kynthei bad shynrang ki la wan ban shim bynta shitrhem ban kyrñiom ktieh ha katei ka jingïakop naduh ka sngi ba sdang.
Katei ka lympung ïakop ñiah kali ka la sdang naduh ka 23 tarik, Risaw bad pynkut pat ha ka 25 tarik Risaw, ha kaba da ki hajar ngut ki paidbah nongpeitkai ki la wan ban sakhi ha katei ka sngi pynkut jong katei ka jingïakop bala pynïakhun ha ki 3 tylli ki kyrdan kata ka Stock Category, Semi-Modified Category bad Pro Modified Category.
Ïa katei ka lympung la wan ban pyndap pyrda da u Bah Paul Lyngdoh MLA ka West Shillong ba dei ruh u nongaibuit ka tnad Social Welfare kum u kongsan, ha ka jingdonlang u Bah Damian Umdor President ka AHOR, Bah Fedinand Jahrin Secretary, Bah Ferdinald Kharkamni Vice Preisdent bad kiwei kiwei.
U Bah Damian D Umdor haba kren ha kane ka sngi u la ong ba kane ka jinglah ban pynlong ïa kane ka lympung ha kane ka shnong ka dei namar ka jingai kylluid jong ka shnong ïa ka jaka ban shna ïa ki jaka ïaid jong ki kali bad ka thong hi jong kane ka lympung ka long ban ai mynsiem ïa ki samla ba ki lah ban sei ïa ka sap ka phong jong ki bad kumjuh ruh ban khring ïa ki briew ba nabar jylla ban wan sha kane ka jylla.
Haba kren ha katei ka sngi u Bah Paul Lyngdoh kum u kongsan u la ai ka jingïaroh ïa ka kynhun AHOR kaba ju pynlong ïa katei ka jingïakop man u snem ban khring ruh ïa ki nongñiah kali na kylleng ka ri bad wat ki nongjngohkai pyrthei ban sakhi ïa katei ka lympung ba ki nongñiah ki pyni ïa ki sap jong ki ban ñiah bad tehlakam ïa ki kali ha ki surok kiba khohruh khohram.
U la ong ruh ba ka jingwan ki nongïashim bynta ha une u snem ka la nang kiew, bad ka long ruh ba sngewtynnad ba ha u ne u snem na ka liang ka tnad Tourism ka la kyrshan ïa kane ka lympung da ka song pisa kaba 10 lakh bad ngeit ba ha ki snem ban wan ngin nang pynheh shuh shuh.
Ngi khmih lynti da ka jingtreilang jong baroh nangne shakhmat ka ïoh ka kot kan kiew, namar bun na ki jaka sah, ki iing basa ki dap bad kane kan long ka lad kamai ruh ïa ki nongshong shnong ha kane ka thaiñ, bad nangne shakhmat ai ba ki paidbah kin nang kiew nang san ha ka ïoh ka kot, la bynrap u Bah Paul.
Ha katei ka sngi ka jingpynkut ïa katei ka lympung na ka liang ki bor pynïaid ki la sam ruh ïa ki khusnam sha ki nongjop da ki trophy bad song pisa.
Ki nongjop ha katei ka lympung ki long ha ka liang ki nongshim bynta ba rangbah tam la rah da u Bah Eugene Niangti, Best Driver ha ka Stock Category la rah da u Bah Bawan Passah, Best Co-Driver pat la rah da u Bah Bari Umdor, ha ka kyrdan Semi Modified Caterory la rah da u Lickstar Marbaniang bad Best Co-Driver la rah da u Bathiangkupar Dkhar, katba ha ka Pro-Modified Category la rah da u Bah Eugene Niangti, Best Co-Driver Bah Arland Kharumnuid kynthup kiwei kiwei ki khusnam.
